पुणे : पुण्याचे माजी महापौर आणि भाजपचे महाराष्ट्र प्रदेशाध्यक्ष मुरलीधर मोहोळ यांच्या नावाने एका बिल्डरला तब्बल ३ कोटी रुपयांची खंडणी मागितल्या प्रकरणी कोथरूड पोलिस ठाण्यात गुन्हा दाखल करण्यात आला आहे. पुण्यात भाजपचे माजी महापौर आणि महाराष्ट्र प्रदेश अध्यक्ष मुरलीधर मोहोळ आणि त्यांचा मावसभाऊ रवी आटोळे यांच्या नावाने एका बिल्डरला तब्बल ३ कोटी रुपयांची खंडणी मागितल्याची धक्कादायक घटना उघडकीस आली आहे. या घटनेमुळे खळबळ उडाली आहे. या प्रकरणी कोथरूड पोलिस ठाण्यात दोघांवर गुन्हा दाखल करण्यात आला आहे.
संदीप पीरगोंडा पाटील, शेखर गजानन ताकवणे (वय ३५, रा भालेकर चाळ कर्वे नगर पुणे) अशी गुन्हा दाखल झालेल्या आरोपींची नावे आहेत. त्यांना अद्याप अटक करण्यात आलेली नाही. या प्रकरणी राजेश दिनेश व्यास यांनी कोथरूड पोलिस ठाण्यात तक्रार दिली आहे. हा प्रकार २५ मार्च रोजी दुपारी १२ ते सायंकाळी पावणे पाच वाजण्याच्या दरम्यान घडला.पोलिसांनी दिलेल्या माहितीनुसार मुरलीधर मोहळ आणि त्यांचे मावस भाऊ रवी आटोळे या दोघांचे मोबाइल आरोपींनी हॅक केले.
या प्रकरणी आरोपी पाटील, ताकवणे यांच्या विरुद्ध खंडणी, धमकावणे, माहिती-तंत्रज्ञान कायद्यान्वये गु्न्हा दाखल करण्यात आला आहे. पौड रस्त्यावर फिर्यादी बांधकाम व्यावसायिकाचे कार्यालय आहे. दोन दिवसांपूर्वी आरोपी पाटील, ताकवणे यांनी बांधकाम व्यावसायिकाच्या मोबाइल क्रमांकावर संपर्क साधला. भाजपचे प्रदेश सरचिटणीस मुरलीधर मोहोळ, त्यांच्या मावसभावाचा नावाचा वापर करुन त्यांनी बांधकाम व्यावसायिकाकडे खंडणी मागितली. भारतीय जनता पक्षाच्या युवा मोर्चाकडून कार्यक्रमाचे आयोजन करण्यात आले आहे. त्यासाठी ३ कोटी रुपये हवे आहेत. पैसे न दिल्यास भविष्यात बांधकाम व्यवसायाला हानी पोहचवू, अशी धमकी पाटील आणि ताकवणे यांनी दिली.
आरोपींनी बांधकाम व्यावसायिकाकडे खंडणी मागण्यासाठी मोबाइल तंत्रज्ञानाचा वापर केला. बांधकाम व्यावसायिकाच्या लक्षात हा प्रकार आल्यानंतर त्यांनी पोलिसांकडे तक्रार दिली. त्यानंतर या प्रकरणात गुन्हा दाखल करण्यात आला असून पोलीस निरीक्षक (गुन्हे) बडे तपास करत आहेत.
