गुजरातच्या समुद्राजवळ एक इराणहून आलेली बोट पकडण्यात आली आहे. या बोटीमध्ये तब्बल 425 कोटींचे ड्रग्स जप्त करण्यात आले आहेत. ऐन होळीच्या तोंड्यावर एटीएस आणि कोस्टगार्डच्या अधिकाऱ्यांनी ही कारवाई केली आहे. गुजरातच्या कच्छ जिल्ह्यातील ओखाच्या समुद्रकिनाऱ्याजवळ एटीएस आणि कोस्टगार्डने ही संयुक्त कारवाई केली आहे. इराणहून आलेली एक संशयास्पद बोट एटीएस आणि कोस्टगार्डने पकडली आहे. या बोटीची तपासणी केली असता त्यामध्ये 425 कोटी किंमतीचे 61 किलो हेरॉइन आढळून आले आहे. या बोटीतून पाच जणांना अटक करण्यात आली आहे.
एटीएसच्या अधिकाऱ्यांनी दिलेल्या माहितीनुसार, एका खबऱ्याने मिळालेल्या माहितीनुसार शहरात मोठ्या प्रमाणात हेरॉइन येणार अशी माहिती मिळाली होती. त्यानुसार ही संयुक्तपणे कारवाई करण्यात आली आहे. ओखा समुद्रकिनाऱ्यापासून तब्बल 340 किलोमीटर दूर अंतरावर एक संशयित बोट आढळून आली. गस्तीवर असलेल्या कोस्टगार्डच्या अधिकाऱ्यांनी बोटीला थांबण्याची सूचना केली. पण, तिथून पळ काढण्याचा प्रयत्न केला. त्यानंतर पाठलाग करून या बोटीला पकडण्यात आलं आहे.
