शेअर मार्केटमध्ये गुंतवणुक केल्यास चांगला परतावा मिळण्याच्या आमिषाने सायबर चोरट्याने कोथरूडमधील ज्येष्ठ नागरिकाला १४ लाख ५९ हजार रुपयांचा ऑनलाइन पद्धतीने गंडा घातला. याबाबत एका ज्येष्ठ नागरिकाने वारजे पोलिस ठाण्यात फिर्याद दिली आहे.
या प्रकरणी पोलिसांनी माहिती-तंत्रज्ञान कायद्यान्वये एका मोबाईल धारकाच्या विरुद्ध गुन्हा दाखल केला आहे. पोलिसांनी दिलेल्या माहितीनुसार, तक्रारदार ज्येष्ठ नागरिक पौड रस्ता भागात राहायला आहेत. सायबर चोरट्याने त्यांच्या मोबाईलवर फोन केला. शेअर बाजारात (ऑनलाइन ट्रेडिंग) गुंतवणूक केल्यास चांगला परतावा मिळेल, असे आमिष चोरट्याने त्यांना दाखविले होते.
चोरट्याच्या आमिषाला ज्येष्ठ नागरिक बळी पडले. त्यानंतर चोरट्याने त्यांच्याकडून ऑनलाइन पद्धतीने वेळोवेळी १४ लाख ५९ हजार रुपये घेतले. त्यांनी चोरट्याला सांगितलेल्या वेगवेगळ्या बँक खात्यात पैसे जमा केले. त्यानंतर त्यांना कोणताही परतावा देण्यात आला नाही. फसवणूक झाल्याचे लक्षात आल्यानंतर त्यांनी वारजे पोलिस ठाण्यात तक्रार अर्ज दिला.
