पुणे : पुण्यातील कसबा आणि पिंपरी चिंचवडमधील चिंचवड या मतदारसंघाच्या पोटनिवडणूक जाहीर झाली आहे. पोटनिवडणुकीत कसब्यात भाजप विरुद्ध काँग्रेस तर चिंचवडमध्ये भाजप विरुद्ध राष्ट्रवादी काँग्रेस अशी लढत आहे. महाराष्ट्र नवनिर्माण सेनेचे अध्यक्ष राज ठाकरे यांनी या पोटनिवडणुका बिनविरोध व्हाव्या अशी भूमिका घेतली होती. मात्र, बिनविरोध निवडणूक करण्याचे प्रयत्न अयशस्वी झाले. कसब्यातून भाजपचे हेमंत रासणे तर काँग्रेसचे रवींद्र धंगेकर आणि चिंचवडमधून भाजपकडून अश्विनी जगताप आणि राष्ट्रवादी काँग्रेसचे नाना काटे यांच्यासह अपक्ष उमेदवार राहुल कलाटे निवडणुकीच्या रिंगणात आहेत. महाराष्ट्र नवनिर्माण सेनेकडून या पोटनिवडणुकीसाठी भाजपला पाठिंबा जाहीर करण्यात आला आहे. मनसेच्या या निर्णयावर राष्ट्रवादी काँग्रेसकडून टीका करण्यात आली आहे. राष्ट्रवादी काँग्रेसचे पुणे शहराध्यक्ष प्रशांत जगातप यांनी मनसेवर टीका केली आहे.
प्रशांत जगताप काय म्हणाले?
राष्ट्रवादी काँग्रेसचे पुणे शहराध्यक्ष प्रशांत जगताप यांनी मनसेनं भाजपला पाठिंबा दिल्यानं जोरदार टीका केली. “कोथरूड मध्ये राष्ट्रवादी आणि काँग्रेसच्या जोरावर उमेदवारी अर्ज भरणारे आता कसब्यात भाजपला पाठिंबा देताय…,बोलघेवडे पोपट ED च्या तालावर नाचू लागलेत”, असं प्रशांत जगताप म्हणाले आहेत. प्रशांत जगताप यांनी यासाठी २०१९ मध्ये कोथरुड विधानसभा मतदारसंघात राष्ट्रवादी आणि काँग्रेसनं मनसेच्या उमेदवाराला पाठिंबा दिला होता. कोथरुड मतदारसंघात भाजपनं चंद्रकांत पाटील यांना उमेदवारी दिली होती. त्यांच्या विरोधात काँग्रेस आणि राष्ट्रवादीनं मनसे उमेदवार अॅड. किशोर शिंदे यांना उमेदवारी दिली होती. किशोर शिंदे यांनी कोथरुडमध्ये तब्बल ८० हजार मतं मिळवली होती. त्याचाच संदर्भ देत प्रशांत जगताप यांनी टीका केली आहे. जगताप यांनी बोलघेवडे पोपट असा उल्लेख करत मनसेवर हल्लाबोल केला आहे.
कसबा आणि चिंचवडमध्ये जोरदार प्रचार
कसबा मतदारसंघात काँग्रेस तर चिंचवडमध्ये राष्ट्र्वादीचा उमेदवार आहे. महाविकास आघाडी म्हणून ही निवडणूक राष्ट्रवादी काँग्रेस, काँग्रेस, शिवसेना उद्धव बाळासाहेब ठाकरे पक्ष लढवत आहेत. समाजवादी पार्टी आणि संभाजी ब्रिगेडनं मविआच्या उमेदवारांना पाठिंबा दिलेला आहे. मविआचे प्रमुख नेते पुण्यात तळ ठोकून आहेत. दुसरीकडे भाजपच्या नेत्यांनी देखील कसबा आणि चिंचवडमध्ये जोर लावला आहे.
मनसेचा भाजपला पाठिंबा
मनसेचे पुण्यातील नेते बाबू वागस्कर यांनी भाजपच्या प्रचारात सहभागी होणार नसलो तरी आमचा पाठिंबा त्यांना असेल, असं जाहीर केलं आहे. भाजपला पाठिंबा देण्याचे आदेश राज ठाकरेंनी दिल्याचं त्यांनी सांगितलं होतं.
गिरीश बापट प्रचारापासून अलिप्त राहणार
भाजपचे पुण्याचे खासदार गिरीश बापट यांनी प्रकृतीच्या कारणांमुळं प्रचारात सहभागी होणार नसल्याचं देखील काल जाहीर केलं आहे.
