पुणे: भगतसिंह कोश्यारी यांचा राज्यपाल पदाचा राजीनामा मंजूर झाल्यानंतर महाराष्ट्रातील राजकीय वर्तुळात त्याचे पडसाद उमटत आहेत. कोश्यारी महाराष्ट्रातून जाणार, ही बातमी समोर आल्यापासून महाविकास आघाडीच्या कार्यकर्त्यांनी जल्लोष करायला सुरुवात केली होती. अशातच रविवारी कसबा पोटनिवडणुकीसाठी काँग्रेसच्या रवींद्र धंगेकर यांच्या प्रचारासाठी घेण्यात आलेल्या सभेत एक वेगळाच प्रकार पाहायला मिळाला. या सभेला काँग्रेसचे प्रदेशाध्यक्ष नाना पटोले आणि विरोधी पक्षनेते अजित पवार उपस्थित होते. यावेळी काही कार्यकर्त्यांनी अचानक भगतसिंह कोश्यारी यांचा काळ्या फुग्यांनी बांधलेला फोटो व्यासपीठावर आणला. हा फुगा अजित पवार यांच्या हातात द्यायचा प्रयत्न केला. मात्र, अजित पवार यांनी हात जोडत कोश्यारींचा फोटो असलेला फुगा हातात घ्यायला नकार दिला. मविआचे कार्यकर्ते आग्रह करत असूनही अजित पवार यांनी शेवटपर्यंत कोश्यारींचा फोटो असलेला फुगा हातात धरला नाही. हा सगळा प्रकार बघून तेथील पोलीस सावध झाले. राज्यपालांचा फोटो असल्यामुळे पोलिसांनी हे सर्व फुगे कार्यकर्त्यांकडून हिसकावून घेतले. यानंतर त्यावरील भगतसिंह कोश्यारी यांचा फोटो काढण्यात आला.
कसबा पोटनिवडणुकीच्या पार्श्वभूमीवर महाविकास आघाडीचे उमेदवार रवींद्र धंगेकर यांच्या प्रचारासाठी पुण्यातल्या नातूबागेत सभा आयोजित केली होती. या सभेत अडथळे आणण्याचा प्रयत्न भाजपच्या कार्यकर्त्यांकडून करण्यात आला. सभेत अजित पवार यांनी भाषणाला सुरुवात करताच भाजपच्या रॅलीला सुरुवात झाली. भाजप कार्यकर्त्यांकडून जोरदार फटके वाजवत घोषणा देत अजित पवार यांच्या भाषणा मध्ये व्यत्यय आणण्याचा प्रयत्न करण्यात आला. मात्र अजित पवार यांनी आपले भाषण सुरुच ठेवले. याबाबत अजित पवार यांना विचारण्यात आले असता त्यांनी म्हटले की, तुमचं भाषण सुरू होताच फटाके वाजवण्यात आले. अजित पवार यांनी उत्तर दिलं की त्याला मी जास्त महत्व देत नाही. गेले ३१ वर्ष मी राजकारणात आहे. असे कितीतरी जण फटाके वाजवणारे आले आणि गेले मी त्याचा विचार करत नाही, असे अजित पवार यांनी म्हटले.
महाविकास आघाडीच्या वतीने आज कसबा मतदारसंघात कार्यकर्ता मेळाव्याचे आयोजन करण्यात आले होते. या सभेसाठी प्रमुख उपस्थिती म्हणून विरोधीपक्ष नेते अजित पवार उपस्थित होते. त्यासोबत कॉंग्रेस प्रदेशाध्यक्ष नाना पटोले, काँग्रेसचे आमदार संग्राम थपटे आणि अनेक स्थानिक पदाधिकारी उपस्थित होते. भाजपने केलेल्या या कृत्यबाबत राष्ट्रवादी पुणे शहर अध्यक्ष प्रशांत जगताप म्हणाले, भारतीय जनता पार्टीला आपला पराभव दिसायला लागला आहे. म्हणून शहर भाजपच्या वतीने अजित पवार यांच भाषण सुरू होताच जोरदार घोषणा देणे आणि फटाके वाजण्याच्या खोडसाळपणा केला आहे. राष्ट्रवादी काँग्रेसचे शहर अध्यक्ष म्हणून मी या घटनेचा निषेध व्यक्त करतो. याबाबत पुणे शहर पोलिसांनी या प्रकरणाचा खुलासा द्यावा. अजित पवार ज्या ठिकाणी सभा घेण्यासाठी येतात त्या ठिकाणी भाजपला रॅली काढण्याची परवानगी काशी काय दिली. याची चौकशी होण्याची गरज आहे. पण एकूणच भाजप ही पराभवाच्या छायाखाली आहे. म्हणून भाजपच्या वतीने असा खोडसाळपणा करण्यात आल्याचे प्रशांत जगताप यांनी म्हटले.
