मुंबई : एकनाथ शिंदेच्या बंडखोरीमुळे महाराष्ट्रात सत्ता संघर्ष निर्माण झाला आहे. 40 पेक्षा जास्त आमदार एकनाथ शिंदे गटासोबत गुवाहाटीमध्ये गेले आहेत. याबाबत एक धक्कादायक अपडेट समोर आली आहे. एकनाथ शिंदेच्या बंडखोर आमदारांनी गुवाहाटीमध्ये राडा घातला आहे. हॉटेलमध्येच दोन आमदारांमध्ये तुफान मारामारी झाल्याचे वृत्त समोर आहे. यामुळे या बंडखोरांमध्येच मतभेद तर सुरु झाले नाहीत ना? असा प्रश्न उपस्थित झाला आहे.

एकनाथ शिंदे हे मंगळवारी दिवसभर सुरतमध्ये होते. त्यानंतर ते सुरतहून आसामच्या दिशेने निघाले. यांनतर त्यांच्या विमानाने गुवाहाटीमध्ये थांबा घेतला. यानंतर गुवाहाटीतून आमदार फोडाफोडीचे राजकारण सुरु झाले. आतापर्यंत 40 पेक्षा अधिक आमदार गुवाहाटीतील एकनाथ शिंदेच्या गटात सहभागी झाले आहे. आमदारांसोबतचे फोटो आणि व्हिडिओ शेअर करत एकनाथ शिंदे सातत्याने शक्ती प्रदर्शन करत आहेत. मात्र, आता याच आमदारांमध्ये हाणामारी झाल्याचे समजते.

अधिक वाचा  पुणे – लोणावळा लोकल फेऱ्या वाढल्या, प्रवाशांना दिलासा

एकनाथ शिंदे हे आमदारांसह हॉटेल रेडिसन ब्ल्यू मध्ये थांबले आहेत. याच हॉटेलमध्ये दोन आमदारांमध्ये मारामारी झाल्याचे वृत्त मिळाले आहे. कोल्हापूर जिल्ह्यातील आमदार प्रकाश आबिटकर आणि अन्य एका आमदारांमध्ये ही मारामारी झाली आहे.

या मारामारीचे वृत्त माजी आमदार राजेश क्षीरसागर यांनी फेटाळले आहे. अबीटकर या पूर्वी नाराज होते. मात्र आता ते नाराज नाहीत. रेडिसन ब्लू हॉटेल मध्ये सगळं काही व्यवस्थित आहे. आज आम्ही एकत्र शाहू जयंती साजरी केली असल्याचेही माजी आमदार राजेश क्षीरसागर यांनी माध्यमांना सांगितले.

राज्याचे उच्चशिक्षण मंत्री उदय सामंत गुवाहाटीत दाखल

अधिक वाचा  यंदा हळदीची विक्रमी निर्यात; २ लाख टनांहून अधिक निर्यातीची शक्यता

दरम्यान, शिवसेनेला आणखी एक धक्का बसला आहे. एकनाथ शिंदे यांच्या बंडात आता राज्यातील आणखी एक मंत्री गेला असण्याची शक्यता आहे. राज्याचे उच्चशिक्षण मंत्री उदय सामंत हे सकाळपासून नॉट रिचेबल आहेत. कालच्या राष्ट्रीय कार्यकारिणीच्या बैठकीला ते उपस्थित होते, मात्र त्यानंतर आज सकाळपासून त्यांचा संपर्क झालेला नाही. एकनाथ शिंदे यांच्या गटात सध्या ३७ हून जास्त शिवसेना आमदार आणि १० हून जास्त अपक्ष आमदार असल्याचे सांगण्यात येते आहे. आता त्यात उदय सामंतही त्यांना जाऊन मिळाल्यास बंडखोरांचे बळ आणखी वाढण्याची शक्यता आहे.