पुणे : पुणे जिल्हा मध्यवर्ती सहकारी बँक संचालक मंडळाच्या निवडणुकीत 21 पैकी 14 जागा बिनविरोध निवडून आल्या होत्या. त्यानंतर उर्वरित 7 पैकी 6 जागा राष्ट्रवादीने जिंकल्या, तर एका जागेवर भाजपने बाजी मारली. त्यामुळे एकहाती सत्ता मिळवण्याची स्वप्न पाहणारे उपमुख्यमंत्री अजित पवार यांच्यासाठी धक्का मानला जात आहे. विशेष म्हणजे भाजप उमेदवार प्रदीप कंद यांना बारामतीमधून 52 मतं मिळाली आहेत, त्यामुळे “साथ कोणी दिली? बारामती” अशा घोषणा कार्यकर्ते देत आहेत.

प्रतिष्ठेची लढत, राष्ट्रवादीचा पराभव

राष्ट्रवादीने प्रतिष्ठेच्या केलेल्या एका जागेवर पक्षाला दणका बसला आहे. राष्ट्रवादीतून भाजपमध्ये गेलेल्या प्रदीप कंद यांनी राष्ट्रवादीच्या सुरेश घुलेंचा पराभव केला आहे. सुरेश घुले यांचा 14 मतांनी पराभव झाला. अजित पवारांनी प्रचार सभेत कंद यांना जागा दाखवून देण्याचं आवाहन केलं होतं. मात्र, नेमकी तीच जागा जिंकण्यात राष्ट्रवादी अपयशी ठरली आहे.

अधिक वाचा  प्रजासत्ताक दिनानिमित्त मातीचे मैदान व क्रीडा संकुलचे भूमिपूजन

कोणी कुठली जागा जिंकली

पुणे जिल्हा मध्यवर्ती सहकारी बँकेच्या निवडणुकीत राष्ट्रवादीचे आमदार अशोक पवार 73 मतांनी विजयी झाले आहेत. त्यांनी भाजपच्या आबासाहेब गव्हाणे यांचा पराभव केला आहे. तर राष्ट्रवादीचे उमेदवार सुनील चांदेरे हे 27 मतांनी विजयी झाले आहेत. चांदेरे यांनी भाजपचे आत्माराम कलाटे यांना पराभूत केलं आहे. हवेलीच्या जागेसाठी झालेल्या मैत्रीपूर्ण लढतीमध्ये राष्ट्रवादीचे विकास दांगट विजयी झाले आहेत. याशिवाय राष्ट्रवादीच्या पूजा बुट्टे पाटील आणि निर्मला जागडे यांचा विजय झाला, तर आशा बुचके यांना पराभवाचा धक्का बसला.

विजयाचा गुलाल, राष्ट्रवादी-भाजप आमनेसामने

निवडणुकीचा पहिला निकाल राष्ट्रवादीच्या बाजूने लागल्यानंतर राष्ट्रवादीच्या कार्यकर्त्यांनी एकच जल्लोष केला होता. राष्ट्रवादीच्या कार्यकर्त्यांनी धावतच रस्त्यावर गुलाल उधळून आनंदाला वाट मोकळी करून दिली. ढोलताशे वाजवत या कार्यकर्त्यांनी जल्लोष केला. यावेळी भाजपचे कार्यकर्ते आणि राष्ट्रवादीचे कार्यकर्ते आमनेसामने आले.

अधिक वाचा  भारतीयांसाठी येतोय दमदार स्वदेशी पर्याय Micromax In Note 2 उद्या होणार लाँच

अनेक वर्षांपासून या बँकेवर राष्ट्रवादीचे दिग्गज नेते अजित पवार यांची एकहाती सत्ता आहे. गेल्या निवडणुकीत उपमुख्यमंत्री अजित पवारांकडे 21 पैकी 21 जागा होत्या. आतापर्यंत त्यांनी सात वेळा जिल्हा बॅंकेच्या अध्यक्षपदाचा मान भूषवला आहे. जिल्हा बँकेच्या संचालक मंडळाच्या या निवडणुकीत 21 पैकी 14 जागा बिनविरोध निवडून आल्या आहेत. उरलेल्या सात जागांसाठी रविवार, दोन जानेवारीला मतदान प्रक्रिया पार पडली होती.

कोणाकोणाची बिनविरोध निवड

प्रतिस्पर्धी उमेदवारांचा अर्ज बाद झाल्याने भोरमधून काँग्रेसचे आमदार संग्राम थोपटे, पुरंदर हवेलीचे काँग्रेस आमदार संजय जगताप बिनविरोध निवडून आले. तर आंबेगाव तालुक्यातून सोसायटी ‘अ’ वर्ग गटातून गृहमंत्री दिलीप वळसे-पाटील यांचा एकमेव अर्ज दाखल झाल्याने त्यांची बिनविरोध निवड झाली.

अधिक वाचा  शाळेची घाई तिसरी लाट असताना का?; 62 टक्के पालकांची वेगळी भूमिका

उपमुख्यमंत्री अजित पवार , खेड येथील राष्ट्रवादीचे आमदार दिलीप मोहिते पाटील, “ब” वर्गातून राज्यमंत्री दत्तात्रय भरणे, इंदापूर “अ” वर्ग सोसायटी मतदारसंघातून विद्यमान संचालक आप्पासाहेब जगदाळे यांचीही बिनविरोध निवड झाली आहे.

अजितदादांची एकहाती सत्ता

पुणे जिल्हा बॅंक ही राज्यातील सहकार क्षेत्रातील अग्रगण्य बॅंक आहे. मागील अनेक वर्षांपासून या बॅंकेवर अजित पवार यांचीच एकहाती सत्ता आहे. अजित पवारांनी त्यांच्या राजकीय कारकिर्दीची सुरुवात जिल्हा बॅंकेतून केली होती. 1991 पासून अजित पवार जिल्हा बॅंकेत आहेत. आतापर्यंत त्यांनी सात वेळा जिल्हा बॅंकेच्या अध्यक्षपदाचा मान भूषवला आहे.

शिरुर

अशोक पवार -109
आबासाहेब गव्हाणे- 21

मुळशी

सुनील चांदेरे- 27

आत्माराम कलाटे- 18

हवेली

विकास दांगट- 73
म्हस्के-58