पुणे: भारताचा अष्टपैलू क्रिकेटपटू कृणाल पंड्याने आपल्या पदार्पणात आज एक विक्रम नोंदवल्याचे पाहायला मिळाले. कारण पदार्पण करताना सर्वात जलद अर्धशतक झळकावण्याचा मान आता कृणालच्या नावावर जमा झाला आहे. हे विक्रमी अर्धशतक झळकावल्यावर कृणालला मैदानात रडू आवरेनासे झाले होते, त्याचबरोबर त्याचा भाऊ हार्दिकही यावेळी भावुक झालेला पाहायला मिळाला. या गोष्टीचा व्हिडीओ सध्याच्या घडीला चांगलाच व्हायरल झाल्याचे पाहायला मिळत आहे.

भारताचा डाव संकटात सापडलेला असताना कृणाल फलंदाजीला आला. त्यावेळी भारताची ४१व्या षटकात ५ बाद २०५ अशी अवस्था होती. त्यावेळी भारतीय संघ तिनशे धावांचा टप्पा ओलांडणार की नाही, याबाबत संभ्रम होता. पण कृणाल फलंदाजीला आला आणि त्याने इंग्लंडच्या गोलंदाजीवर चौफेर हल्ला चढवला. इंग्लंडच्या गोलंदाजांचा खरपूस समाचार घेताना कृणालने २६ चेंडूंत आपले अर्धशतक पूर्ण केले. आतापर्यंत पदार्पण करताना कोणत्याही खेळाडूला एवढ्या कमी चेंडूंमध्ये अर्धशतक पूर्ण करता आलेले नाही.

अधिक वाचा  ‘बिग बॉस’ फेम मुनव्वर फारुकी पोलिसांच्या ताब्यात, हुक्का पार्लरमध्ये रेडदरम्यान कारवाई

कृणालने अर्धशतक झळकावले तेव्हा तो भावुक झाल्याचे पाहायला मिळाले. कारण वडिलांच्या निधनानंतर तो पहिल्यांदाच आंतरराष्ट्रीय सामना खेळत होता. त्याचबरोबर आपल्या पहिल्याच एकदिवसीय सामन्यात त्याने नाबाद अर्धशतकही झळकावले होते. त्यामुळे कृणालने जेव्हा आपले अर्धशतक पूर्ण केले तेव्हा आकाशाकडे पाहत तो रडायला लागला. त्यावेळी कृणालचा भाऊ हार्दिकही भावुक झाल्याचे पाहायला मिळाले होते. या सामन्यात कृणालने ३१ चेंडूंत सात चौकार आणि दोन षटकारांच्या जोरावर नाबाद ५८ धावांची खेळी साकारली. कृणाल आणि हार्दिक या सामन्यात कसे भावुक झाले होते, त्याचा व्हिडीओ आता चांगलाच व्हायरल झालेला पाहायला मिळत आहे.

अधिक वाचा  मविआचं ठरलं? वंचितला सोबत घेणार नाही? शरद पवारांच्या एका वाक्यामुळे चर्चेला उधाण!

कृणाल आणि लोकेश राहुल या दोघांनीही यावेळी आपले अर्धशतक झळकावलेच, पण त्याचबरोबर भारतीय संघाला तिनशे धावांचा टप्पा ओलांडता आला. या दोघांच्या फटकेबाजीमुळे भारतीय संघाला ३१७ धावा करता आल्या. या दोघांनी सहाव्या विकेटसाठी यावेळी ११२ धावांची अभेद्य भागीदारी रचली.