नवी दिल्ली: काँग्रेसचे बंडखोर नेते सचिन पायलट यांनी पक्षाचे नवनियुक्त प्रदेशाध्यक्ष गोविंदसिंह डोटासरा यांचे राजस्थान प्रदेश काँग्रेस कमिटीचे अध्यक्ष झाल्याबद्दल अभिनंदन केले आहे. आपण कोणाच्याही दबावात न येता राज्यात सरकार स्थापनेसाठी मेहनत घेतलेल्या कार्यकर्त्यांचा पूर्ण सन्मान कराल, असा विश्वास व्यक्त करत सचिन पायलट यांनी अशोक गहलोत गटाला अप्रत्यक्षपणे टोला लगावला आहे. यापूर्वी पायलट हे राजस्थान काँग्रेसचे अध्यक्ष होते. त्यांना काँग्रेसने उपमुख्यमंत्रिपदावरून आणि राजस्थान काँग्रेसच्या अध्यक्षपदावरून काढून टाकले होते.
पायलट यांनी बंडखोरी करत मुख्यमंत्री अशोक गहलोत यांच्याविरोधात मोर्चा उघडला आहे. सचिन पायलट यांना १८ आमदारांचा पाठिंबा आहे. पायलट यांच्या बंडाला उत्तर देताना गेहलोत यांनी सभापतींच्या नोटीशीद्वारे पायलट आणि त्यांना समर्थन देणाऱ्या आमदारांच्या विधानसभा सदस्यत्वाला आव्हान दिले आहे. या प्रकरणात दोन्ही बाजूंकडून न्यायालयात कायदेशीर लढाई लढली जात आहेत.
विशेष म्हणजे सचिन पायलट यांनी अद्याप अधिकृतपणे काँग्रेस पक्ष सोडलेला नाही. ते सातत्याने आपण अजूनही काँग्रेस पक्षाचे सदस्य असल्याचे म्हणत आहेत. अशोक गेहलोत सरकार सचिन पायलट यांच्या विरोधाचा सामना तर करत आहेतच. पण दुसऱ्या बाजूने त्यांना राज्यपाल कलराज मिश्र यांच्याकडूनही निर्माण झालेल्या अडसराला देखील सामोरे जावे लागत आहे. एकीकडे गेहलोत विधानसभेचे अधिवेशन बोलण्याची मागणी करीत आहेत, तर दुसरीकडे राज्यपाल कलराज मिश्र मात्र त्यांच्या मागणीच्या विरोधात असल्याचे दिसत आहे.
राजस्थानच्या राजकीय लढाईत एकीकडे काँग्रेस भारतीय जनता पक्षावर (भाजप) सरकार पाडण्याचा कट रचल्याचा आरोप करीत आहे, तर दुसरीकडे भाजप या आरोपाचा इन्कार करत हा काँग्रेस पक्षातील अंतर्गत मतभेद असल्याचा दावा करत आहे. आता सर्वांचे लक्ष विधानसभा अधिवेशनाकडे लागले आहे.
जर राज्यपालांनी विधानसभेचे अधिवेशन बोलावले तर सर्वांचे लक्ष गेहलोत गट, पायलट गट आणि भाजप यांची रणनीती काय असेल यावरच असेल, हे स्पष्ट आहे.
