लखनऊ: गेल्या ५ दिवसांमध्ये बस, ट्रेन, पायी किंवा इतर साधनांचा वापर करत तब्बल ४ लाख स्थलांतरित मजूर उत्तर प्रदेशात दाखल झाले आहेत. या मजुरांपैकी एकूण १ लाख मजूर हे फक्त सोमवारी दाखल झाले आहेत. दरम्यान, सरकारला कोणतीही योग्य प्रकारे माहिती न दिलेल्या स्थलांतरित मजुरांनी तत्काळ उत्तर प्रदेश सरकारला आपण आल्याची माहिती द्यावी, असे आवाहन उत्तर प्रदेशचे मुख्यमंत्री योगी आदित्यनाथ यांनी स्थलांतरितांना केले आहे.
उत्तर प्रदेश सरकारने स्थलांतरितावर लक्ष ठेवण्यासाठी आपली यंत्रणा सक्षम केली असून या यंत्रणेद्वारे उत्तर प्रदेशात येणाऱ्या स्थलांतरितांची खडाणखडा माहिती प्रशासनाला देण्यात येणार आहे. देशातील विविध राज्यांमधून उत्तर प्रदेशात आलेले स्थलांतरित क्वारंटीनचे नियम व्यवस्थित पाळतात की नाही, यावर देखील ही यंत्रणा नजर ठेवून असणार आहे. या यंत्रणेत नेहरू युवा केंद्र, युवक मंगल दल, चौकीदार, आशा वर्कर्सच्या प्रतिनिधींचा समावेश करण्यात येत आहे.
येत्या काही दिवसांमध्ये उत्तर प्रदेशात लाखो स्थलांतरित येणार असून स्थलांतरितांनी होम क्वारंटीनचे नियम पाळले नाहीत, तर उत्तर प्रदेशातील करोनाबाधितांची संख्या वाढण्याची शक्यता निर्माण होईल. हे लक्षात घेता सामाजिक स्तरावर करडी नजर ठेवणे हे आमचे सर्वात प्रभावी हत्यार ठरेल, असे एका शासकीय अधिकाऱ्याने सांगितले.
दरम्यान, लॉकडाउनमुळे नेपाळमधील २ हजार नागरिक उत्तर प्रदेशात अडकले असून त्याना आपल्या देशात पाठवण्याची व्यवस्था करणे आवश्यक असल्याचे, मुख्यमंत्री योगी म्हणाले. या बरोबरच ज्यांना उत्तर प्रदेशात राहायचे आहे, अशांची राहण्याची आणि खाण्या-पिण्याची व्यवस्था करण्यात येईल, असेही ते म्हणाले.
सोमवार, सकाळपर्यंत एकूण १८४ ट्रेनद्वारे एकूण २ लाख २० हजार ६४० स्थलांतरित उत्तर प्रदेशात आले. तसेच सोमवारी रात्रीपर्यंत आणखी ७१ अतिरिक्त ट्रेनद्वारे सुमारे ७० हजार स्थलांतरित उत्तर प्रदेशात दाखल होतील अशी अपेक्षा व्यक्त करण्यात येत आहे.
