सरकारी आणि खाजगी प्रयोगशाळांमध्ये मिळून मुंबईत आतापर्यंत करोनाच्या एक लाख चाचण्या पूर्ण करण्यात आल्या आहेत. बुधवारी ७६९ नवीन रुग्ण आढळले असून एकूण आकडा १० हजार ५२७ वर गेला आहे. आतापर्यंत केलेल्या चाचण्यांच्या तुलनेत बाधित रुग्णांचे प्रमाण १० टक्के असल्याचे आढळून आले आहे.
मुंबईतील करोनाच्या चाचण्यांचे प्रमाण वाढवण्यासाठी खाजगी प्रयोगशाळांनादेखील चाचण्यांची परवानगी देण्यात आली होती. त्यानुसार मुंबईत ६ सरकारी प्रयोगशाळा व ११ खाजगी प्रयोगशाळांमध्ये मिळून एक लाख करोना चाचण्या करण्यात आल्या आहेत. बुधवारी मुंबईत ७६९ रुग्ण आढळले असून आतापर्यंतची ही सर्वात मोठी संख्या आहे. मुंबईतील रुग्णांची एकूण संख्या १०,५२७ वर गेली आहे. बुधवारी १५९ रुग्ण बरे होऊन घरी गेले आहेत. तर आतापर्यंत २२८७ रुग्ण करोनामुक्त झाले आहेत. रुग्ण बरे होण्याचे प्रमाण २१ टक्केआहे.
मुंबईमध्ये मृत्युदर ३.९ टक्के
बुधवारी आणखी २५ रुग्णांच्या मृत्यूची नोंद झाली असून मृतांचा आकडा ४१२ वर गेला आहे. मृतांमध्ये १५ पुरुष व १०महिला आहेत. तर सहा रुग्णांना कोणताही आजार नव्हता. मुंबईतील करोना रुग्णांचा मृत्युदर ३.९ टक्के आहे.
मुंबईतील वाढती रुग्णसंख्या लक्षात घेऊन येत्या १५ दिवसात मुंबईत आणखी करोना काळजी केंद्र उभारण्याचे पालिकेने ठरवले आहे. महालक्ष्मी रेसकोर्स, नेहरू विज्ञान केंद्र, बीकेसी येथील एमएमआरडीए मैदान, माहीम निसर्गोद्यान, गोरेगाव येथील नेस्को मैदान या ठिकाणी करोना काळजी केंद्र -२ सुरू करण्यात येणार आहे. त्यामुळे करोना काळजी केंद्रातील खाटांची संख्या ३४ हजार होणार आहे. जे रुग्ण करोनाबाधित आहेत पण त्यांच्यात कोणतीही लक्षणे दिसत नाहीत अशा रुग्णांना या सीसीसी २ केंद्रात ठेवले जाणार आहे. विशेषत: जे रुग्ण झोपडपट्टय़ांमध्ये राहतात अशा रुग्णांना इथे ठेवले जाणार आहे.
साडेतीन हजार मजूर रवाना
पनवेलमधील करोनाबाधितांची संख्या बुधवारी १४४ वर पोहचली एका दिवसात ११ जणांना करोनाची लागण झाल्याचे स्पष्ट झाले आहे. पनवेलमधील परिसरात अडकलेल्या ३६०० मजूरांना त्यांच्या मूळ गावी रेल्वेने पाठविण्यात आले. बुधवारी खारघरमध्ये ३, कामोठे ३, उलवा नोड येथे २ तर विचुंबे, आकुर्ली व उसर्ली या गावांमध्ये प्रत्येकी एक रुग्ण आढळला.
धारावीतील बाधितांची संख्या ७३३
धारावीमध्ये बुधवारी ६८ जणांना करोनाची लागण झाल्याचे समोर आले असून, एका रुग्णाचा मृत्यू झाला आहे. त्यामुळे धारावीमधील एकूण बाधितांची संख्या ७३३, तर मृतांची संख्या २१ वर पोहोचली आहे. धारावीमध्ये वेगाने पसरणाऱ्या करोना संसर्गाला आळा घालण्यासाठी पालिकेने ‘मिशन धारावी’ हाती घेतले आहे. पालिकेचे नऊ दवाखाने आणि ३५० खासगी दवाखान्यामध्ये धारावीकरांची तपासणी करण्यात येत आहे.
माहीम, दादरमध्ये रुग्णसंख्येत वाढ
माहीम आणि दादरमधील करोनाबाधित रुग्णांच्या संख्येत बुधवारी वाढ झाली. माहीममधील वृंदावन इमारत, पोलीस वसाहत, साई नगर, रहेजा रुग्णालय, मोरी रोड, पाल्म ट्रस्ट इमारत, माहीम कॉजवे येथील ११ जणांना, तर दादरमधील कासारवाडी, पद्मावती चाळ, हनुमान सोसायटी, एम. सी. जावळे मार्ग, एस. बी. रोड, जय हनुमान सोसायटी येथील आठ जणांना बुधवारी करोनाची बाधा झाल्याचे उघडकीस आले. त्यामुळे माहीम आणि दादरमधील करोनाबाधितांची संख्या अनुक्रमे ९१ आणि ६४ वर पोहोचली आहे.
ठाणे जिल्ह्य़ात ११५ नव्या रुग्णांची नोंद
ठाणे जिल्ह्य़ात करोनाबाधितांचा आकडा वाढत असून बुधवारी जिल्ह्य़ात ११५ नव्या रुग्णांची नोंद करण्यात आली. सर्वाधिक रुग्ण हे ठाणे आणि नवी मुंबई महापालिकेच्या क्षेत्रात आढळून आले असून ठाणे महापालिका क्षेत्रात ४६, तर नवी मुंबई महापालिका क्षेत्रात ४५ रुग्णांचा समावेश आहे. त्यामुळे जिल्ह्य़ातील करोनाबाधित रुग्णांचा आकडा आता १ हजार ५१३ इतका झालेला आहे.
ठाणे महापालिका क्षेत्रात ४६, तर नवी मुंबई महापालिका क्षेत्रात ४५ रुग्णांची नोंद करण्यात आली. त्यामुळे ठाणे महापालिका क्षेत्रातील करोनाबाधितांचा आकडा ४९६ इतका झालेला आहे. ठाण्यातील वागळे, लोकमान्यनगर आणि मुंब्रा प्रभाग समिती अंतर्गत रुग्णांचा आकडा सातत्याने वाढता दिसत आहे. तर नवी मुंबई महापालिका क्षेत्रातील करोनाबाधितांचा आकडाही ४४० इतका झालेला आहे. त्यामुळे ठाणे आणि नवी मुंबई महापालिका क्षेत्रातील परिस्थिती चिंताजनक असल्याचे चित्र आहे. कल्याण डोंबिवली महापालिका क्षेत्रात नऊ नव्या रुग्णांची नोंद करण्यात आला असून येथील रुग्णांची संख्या २३३ इतकी, मीरा-भाईंदर येथे सहा नव्या रुग्णांची नोंद करण्यात आली असून येथील करोनाबाधितांचा आकडा १९६ इतका, ठाणे ग्रामीण भागात आठ रुग्ण आढळले असून येथे एकूण ५८ रुग्ण झाले आहेत. तर उल्हासनगर येथे एका नव्या रुग्णांची नोंद करण्यात आली आहे.
जेजे मार्ग पोलीस ठाण्यातल्या २६ जणांना लागण
सर जे जे मार्ग पोलीस ठाण्यातील २६ अधिकारी, अंमलदारांना करोनाची लागण झाल्याने मुंबई पोलीस दलात चिंता पसरली आहे. इतके मनुष्यबळ बाधित होणारे हे राज्यातील एकमेव पोलीस ठाणे असावे. राज्य पोलीस मुख्यालयात बुधवार पहाटेपर्यंत ४९५ अधिकारी, अंमलदारांना करोनाची लागण झाल्याची नोंद होती. त्यात निम्मे बाधित मुंबई पोलीस दलातील आहेत, असे सांगण्यात आले. शहरातील अत्यंत गजबजलेल्या वस्तीची जबाबदारी जेजे मार्ग पोलीस ठाण्यावर आहे. जेजे रुग्णालयाच्याच आवारात पोलीस ठाणे आहे. गेल्या काही दिवसांपासून पोलीस ठाण्यात नोंदणीसाठी परप्रांतीय मजुरांची गर्दी असते. तितकीच गर्दी वैद्यकीय प्रमाणपत्रासाठी जेजे रुग्णालयाबाहेर रोज होते. याशिवाय परिसरात दाट लोकवस्ती असून निर्बंध झुगारण्याची मानसिकता असलेल्यांचे प्रमाण जास्त आहे. त्यामुळे या पोलीस ठाण्यातील पोलिसांना जास्त लागण झाली.
