करोनाचा फैलाव वाढत असल्याने लॉकडाउन ३ मेपर्यंत वाढवण्याचा निर्णय घेण्यात आला आहे. पंतप्रधान नरेंद्र मोदी यांनी ही घोषणा केली आहे. पंतप्रधान नरेंद्र मोदी यांनी देशवासियांशी संवाद साधताना १४ एप्रिल नंतर लॉकडाउनचा कालावधी १९ दिवसांनी वाढवण्यात आल्याची घोषणा केली. या घोषणेनंतर रेल्वेनेही प्रवासी वाहतूकीवरील निर्बंध ३ मेपर्यंत वाढवण्याचा निर्णय घेतला आहे. त्यामुळे आता ३ मेपर्यंत देशामध्ये रेल्वे सेवा बंद राहणार आहे. मुंबईतील लोकल ट्रेनची वाहतूकही त्यामुळे बंदच राहणार आहे. जीवनावश्यक वस्तूंच्या पुरवठ्यासाठी मालगाड्या मात्र सुरु राहणार आहेत.
पंतप्रधान नरेंद्र मोदी यांनी २४ एप्रिल रोजी पहिल्यांदा २१ दिवसांच्या लॉकडाउनची घोषणा केली होती त्यानंतर लगेचच रेल्वेनेही प्रवासी रेल्वेसेवा बंद करण्याचा निर्णय घेतला होता. हाच कालावधी आता रेल्वेने ३ मेपर्यंत वाढवला आहे. २१ दिवसांच्या लॉकडाउन १४ एप्रिल रोजी संपणे अपेक्षित होते. त्यामुळेच १५ एप्रिलपासून रेल्वेचे तिकीट उपलब्ध होत असल्याने १४ तारखेनंतर रेल्वे सेवा सुरु होईल अशी अपेक्षा व्यक्त केली जात होती. मात्र आज मोदींनी लॉकडाउनचा कालावधी १९ दिवसांनी वाढवल्यानंतर रेल्वेनेही पुढील १९ दिवस प्रवासी वाहतूक सुरु न करण्याचा निर्णय घेतला आहे.
“करोनाचा प्रसार रोखण्यात अद्यापही यश आलेलं नाही. त्यासंबधी राज्यांच्या मुख्यमंत्र्यांशी चर्चा करण्यात आली. लॉकडाउन वाढवला जावा असा सल्ला देण्यात आला आहे. अनेक राज्यांनी आधीच हा निर्णय घेतला आहे. सर्व सूचना लक्षात घेता लॉकडाउन ३ मेपर्यंत वाढवण्याचा निर्णय घेत आहोत,” असं नरेंद्र मोदींनी जनतेशी संवाद साधताना स्पष्ट केलं आहे. मात्र आठवडाभर म्हणजेच २० एप्रिलपर्यंत लॉकडाउनचे निर्बंध कायम ठेवण्यात येणार असून काही भागांमध्ये जेथे करोनाचा प्रदुर्भाव झालेले नाही अशा भांगामधील निर्बंध उठवण्यासंदर्भातील संकेतही मोदींनी दिले आहेत.

अधिक वाचा  शाही विवाह सोहळा! 10 कमांडो, 500 सुरक्षा रक्षक, 100हून अधिक वाहतूक पोलीस VVIPसाठी खास गिफ्ट