मंगळुरू: करोना आणि लॉकडाउनच्या काळात मैत्रीला जागण्याची चित्रविचित्र उदाहरणे समोर येऊ लागली आहेत. या उचापतींमुळे पोलिसांची डोकेदुखी मात्र वाढली आहे. आता मंगळुरूचेच उदाहरण घ्या…. मेंगळुरूत मित्रालाच अपार्टमेंटमध्ये येण्याचा मज्जाव करण्यात आल्यानंतर त्याच्या मित्राने त्याला सुटकेसमध्ये बंद करून घरी घेऊन आला. असेच काहीसे उदाहरण गुजरातमध्येही घडले आहे. गुजरातमध्ये एका व्यक्तीला तंबाखूची तलब आली. यासाठी त्या व्यक्तीच्या मित्राने ड्रोनच्या मदतीने पान आणि तंबाखू पाठवली.
मेंगळुरूतील एका अपार्टमेंटमध्ये येण्यास बाहेरच्या कोणत्याही व्यक्तीसाठी रहिवाशांनी प्रवेशबंदी केली. मात्र, त्याच अपार्टमेंटमध्ये राहणाऱ्या एका १७ वर्षीय मुलाने विचित्र आणि जीवघेणी शक्कल लढवली. त्याने थेट आपल्या मित्राला सुटकेसमध्ये भरून घरी आणले. याबाबत पोलिसांनी दिलेल्या माहितीनुसार, या मुलाने आपल्या मित्राला घरी आणण्यासाठी अपार्टमेंटकडे अनेकदा परवानगी मागितली. मात्र, त्याला ही परवानगी मिळाली नाही. यानंतर त्याने हे पाऊल उचलले. मात्र, आपल्याकडे अशी कोणतीही विनंती आली नसल्याचे अपार्टमेंटचे म्हणणे आहे.
इमारतीच्या सुरक्षा रक्षकाने दिली माहिती
सूत्रांनी दिलेल्या माहितीनुसार, १७ वर्षाचा हा मुलगा एक मोठी सुटकेस घेऊन शनिवारी मध्यरात्रीनंतर सुमारे २ वाजता स्कूटी घेऊन बाहेर पडला. त्याने आपल्या मित्राला बोलावले आणि स्कूटीवर बसवून आपल्या सोबत अपार्टमेंटजवळ आणले. अपार्टमेंटच्या बाहेर त्याने मित्राला सुटकेसमध्ये बसण्यास सांगितले आणि नंतर सुटकेस ओढत ओढत तो आत आला. हे पाहून इमारतीच्या सुरक्षा रक्षकाला काहीतरी विचित्र प्रकार सुरू असल्याचे जाणवले. त्याने अपार्टमेंटच्या समितीला ही बाब कळवली. मात्र, दोन्ही मुले अल्पवयीन असल्याने पोलिसांनी त्यांना सोडून दिले.
ड्रोनद्वारे पाठवले पान, बनवला व्हिडिओ
लॉकडाउनमुळे व्यसनी लोक त्रस्त झाले आहेत. अशाच एका तंबाखूच्या व्यसनी व्यक्तीसाठी त्याच्या मित्राने त्याला ड्रोनद्वारे तंबाखू असलेले पान पाठवले. त्यांनी या स्काय डिलिव्हरीचा टिकटॉक व्हिडिओही पाठवला. हा व्हि़डिओ सोशल मीडियावर व्हायरल झाला.
नियमाचे उल्लंघन केल्याने दोघांनाही अटक
हा किस्सा आहे गुजरातमधील नीलकंठ सोसायटीमधील. तंबाखूचा व्यसनी असलेला २६ वर्षीय रवी भडानिया याच्याकडे ड्रोन होते. त्याने आपला मित्र हिरेन गरधारिया याच्याकडे हा ड्रोन पाठवला. त्यानंतर गरधारिया याने या ड्रोनद्वारे तंबाखू-पान पाठवले. हिरेनचे नीलकंठ सोसायटीच्या १०० मीटरच्या अंतरावरच पानाचे दुकान आहे. लॉकडाउन तोडल्याने पोलिसांनी दोघांनाही अटक केली आहे.

अधिक वाचा  मुख्यमंत्री शिंदेंची मोठी कामगिरी! एनडीएच्या प्रचारासाठी प्रचाराला गेले अन् थेट दोन आमदारच पक्षात घेऊन आले!