जगभरात करोनाचे थैमान सुरू आहे. जगभरातील २०० देशांमध्ये करोनाचे थैमान सुरू आहे. करोनाच्या आजारावर औषध शोधण्याचे प्रयत्न जगभरात सुरू आहेत. तर, दुसरीकडे करोनाच्या संसर्गाने मृत्यूमुखी पडणाऱ्यांची संख्या वाढत आहे. २१ व्या शतकात तंत्रज्ञान आणि विकास केल्याचा दावा करणाऱ्या मानवाने करोनासमोर हात टेकले आहेत. २१ व्या शतकात होत असलेल्या अत्याधुनिक प्रयोगाच्या काळातून वैज्ञानिकांना आता तब्बल १०० वर्ष मागे जावे लागणार आहे. किंबहुना करोनाने तशी वेळ संशोधकांवर आणली आहे. करोनाच्या लढाईत शंभर वर्षापूर्वीच्या औषधावर सगळ्या जगाचे लक्ष लागले आहे. सुमारे शंभर वर्षांपूर्वीची बीसीजी (बेसिलस कॅलमेट-ग्यूरिन) अर्थात क्षयरोग प्रतिबंधक लसीवर सगळ्यांच्या नजरा लागल्या आहेत. या लसीचा वापर १९२१ मध्ये करण्यात आला होता.
बीसीजी लसने उपचार?
बीसीजी लसीचा वापर विषाणूंमुळे होणाऱ्या क्षयरोगाला प्रतिबंध करण्यासाठी करण्यात येतो. क्षयरोग आणि कोविड १९ हे दोन्ही वेगळ्या प्रकारचे आजार आहेत. क्षयरोग हा जीवाणूंपासून होतो.. तर, करोनाचा आजार विषाणूंपासून होतो. वैज्ञानिकांच्या माहितीनुसार, बीसीजी लसीमुळे माणसांच्या शरीरातील रोगप्रतिकारक शक्ती वाढू शकते. माणसाची रोगप्रतिकारक शक्ती चांगली असल्यास त्याला करोनाचा संसर्ग होण्याची शक्यता कमी असल्याचे म्हटले जाते. हार्वर्ड मेडिकल स्कूलचे सहाय्यक प्राध्यापक डॉ. डिनाइज फॉस्टमॅन यांनी सांगितले की, क्लिनिकल चाचणी दरम्यान, ही लस देण्यात आल्यानंतर काहीजणांमध्ये सकारात्मक परिणाम दिसून आला. या रुग्णांचा क्षयरोगाशी काहीही संबंध नव्हता असेही त्यांनी सांगितले. डिनाइज यांनी बीसीजी लसच्या टाइप-१ डायबेटिकवर परिणामाबाबत संशोधन केले आहे.
अपारंपरीक पद्धतीत करोनावर उपाय?
अमेरिकेच्या अन्न व औषध प्रशासनाने करोना व्हायरसशी मुकाबला करण्यासाठी कोणतीही लस अथवा उपचार सुचवले नाहीत. मात्र, त्यांनाही बीसीजीची लस कोविड-१९ वर परिणामकारक ठरेल असा विश्वास वाटत आहे. वंडरबिल्ट युनिर्व्हसिटी स्कूल ऑफ मेडिसीनमधील संसर्गजन्य आजारांचे तज्ञ डॉक्टर विलियम शाफनर यांनी सांगितले की, हा थोडा वेगळा पर्याय आहे. मात्र, करोनाला मात देण्यासाठी जरा आउट ऑफ द बॉक्स जाऊन विचार करण्याची आवश्यकता आहे. लोकांचा यावर विश्वास त्वरीत बसू शकतो. मात्र, आपल्याला काही दिवस आणखी प्रतिक्षा करावी लागेल असेही त्यांनी सांगितले.
अमेरिकेतही चाचणी होणार
बीसीजी लसीच्या वापराबाबत काही देशांनी क्लिनिकल चाचणी सुरू केली आहे. यामध्ये ऑस्ट्रेलिया आणि नेदरलँड्सचाही समावेश आहे. अमेरिकेतही या लसीची क्लिनिकल चाचणी करण्यात येणार आहे. त्यादृष्टीने तयारी सुरू करण्यात आली आहे. प्रशासकीय पातळीवर मंजूरी मिळाल्यानंतर डॉक्टर डिनाइज हे बॉस्टनमध्ये ४००० आरोग्य कर्मचाऱ्यांच्या मदतीने क्लिनिकल चाचणी करणार आहेत. जागतिक आरोग्य संघटनेनेदेखील या बीसीजी लसीला सुरक्षित लस मानले असून अत्यावश्यक औषधात समावेश केला आहे. आतापर्यंत जगातील ३ अब्जाहून अधिकजणांना ही लस देण्यात आली आहे. (संग्रहित छायाचित्र)
भारताच्या आशा उंचावल्या
अमेरिकेसारख्या विकसित देशांमध्ये या लसीच्या वापराबाबत काहीही धोरण नाही. या बीसीजी लसीचा वापर विकसनशील देशामध्ये अधिक प्रमाणावर करण्यात येतो. एका अभ्यासानुसार, ज्या देशांमध्ये बीसीजी लस देण्यात आली त्या देशांमध्ये करोनामुळे होणारा मृत्यू दर कमी आहे. भारताचा या यादीत समावेश आहे. भारतात १९६२ पासून राष्ट्रीय क्षयरोग प्रतिबंधक कार्यक्रमानुसार मुल जन्माला आल्यानंतर बीसीजी लस टोचली जाते. बीसीजी लस टोचल्यानंतर रोगप्रतिकारक शक्ती वाढली असल्याचेही काही संशोधनात आढळून आले आहे.

अधिक वाचा  आता मेट्रोचं तिकीट काढण्याची गरजच नाही! प्रवाशांसाठी लाँच केलं ‘स्मार्ट बँड’