नवी दिल्ली : एकीकडे देश करोना व्हायरसशी झुंजत असतानाच दुसरीकडे पाकिस्तानच्या दहशतवादी कारवाया सुरुच असल्याचं समोर आलंय. काश्मीरच्या केरन सेक्टरमध्ये दहशतवाद्यांनी पुन्हा एकदा घुसखोरी करण्याचा प्रयत्न केला. परंतु, सतर्क जवानांनी हा प्रयत्न उधळून लावला. घुसखोरी करणाऱ्या पाच दहशतवाद्यांना ठार करतानाच स्पेशल फोर्सच्या पाच जवानांनाही आपले प्राण गमवावे लागले आहेत. हे सर्व जवान चर्चित ‘सर्जिकल स्ट्राईक’मध्ये सहभागी झालेल्या ४ पॅराशूट रेजिमेंटचा एक भाग होते, अशी माहिती भारतीय लष्कराचे प्रवक्ते कर्नल अमन आनंद यांनी दिली.
‘हॅन्ड टू हॅन्ड’ लढाई
१० हजार फूट उंचीवर स्पेशल फोर्स आणि दहशतवाद्यांमध्ये ही लढाई अगदी ‘हॅन्ड टू हॅन्ड’ झाली. ४ पॅराशूट रेजिमेंटच्या जवानांनी सर्व सशस्र घुसखोरांचे प्रयत्न फोल ठरवले. दहशतवाद्यांच्या घुसखोरीची सूचना मिळताच या जवानांना हवाई माध्यमातून दहशतवादी असलेल्या भागात पोहचवण्यात आलं होतं. ही लढाई इतकी जवळून झाली की ज्या दहशतवाद्याला ठार केलं त्याच्याच शेजारी एका भारतीय जवानाचा मृतदेह आढळला.
पाच जवान शहीद
दहशतवाद्यांसोबत झालेल्या लढाईत दोन तीन जवान जागीच शहीद झाले तर दोन जवान गंभीर जखमी झाले होते. त्यांना एअरलिफ्ट करून तत्काळ मिलिट्री हॉस्पीटलमध्ये दाखल करण्यात आलं परंतु, त्यांचे प्राण वाचविण्यात डॉक्टरांना अपयश आलं. त्यामुळे एकूण पाच जवानांना गमावावं लागलंय.
४ पॅराशूट रेजिमेंटचं धाडस
१ एप्रिल रोजी पहिल्यांदा दहशतवाद्यांच्या पावलांचे ठसे सुरक्षा यंत्रणेला आढळून आले होते. केरन सेक्टरमध्ये एका मानवरहीत व्हेईकलच्या माध्यमातून घुसखोरीचा हा प्रयत्न सुरक्षा यंत्रणेच्या लक्षात आला होता. त्यानंतर ४ एप्रिल रोजी हे ऑपरेशन राबवण्यात आलं. सध्या या भागात प्रचंड बर्फवृष्टी सुरू असल्यानं रेग्युलर आर्मी युनिटला इथपर्यंत पाठवण्यात काही समस्या येत असल्यानं ४ पॅराशूट रेजिमेंटच्या स्पेशल फोर्सनं हे आव्हान आपल्या खांद्यावर घेतलं. यासाठी दोन स्पेशल युनिटचे दोन स्क्वॉडस् तैनात करण्यात आले होते… आणि ५ एप्रिल रोजी पहाटे दहशतवादी – जवाना आमने-सामने आले.
बर्फात अडकले जवान
सूत्रांच्या माहितीनुसार, सुबेदार संजीव कुमार यांच्या नेतृत्वाखालील स्क्वॉडनं दहशतावद्यांचे पावलांचे ठसे ओळखून त्यांचा पाठलाग केला. या स्क्वॉडमध्ये हवालदार देवेंद्र सिंह, पॅराट्रुपर बालक्रिश्नन, पॅराट्रुपर अमित कुमार आणि पॅराट्रुपर छत्रपाल सिंह यांचा समावेस होता. दहशतावाद्यांचा पाठलाग करतानाच स्क्वॉडचे तीन जवान बर्फात अडकले. दहशतवादी याच भागात लपून बसले होते. त्यांनी या परिस्थितीचा फायदा घेत जवानांवर हल्ला केला. दहशतवाद्यांत आणि जवानांत एवढ्या जवळून सुरू असलेली लढाई पाहून इतर दोन जवानही त्याच भागात पोहचले.
एका फुटाचं अंतर
‘जवानांनी आपली पोझिशन घेतली तेव्हा जवान आणि दहशतवाद्यांमध्ये अगदी एका फुटाचं अंतर उरलं होतं. पॅरा जवानांनी बर्फात अडकल्यानंतरही दहशतवाद्यांना चोख प्रत्यूत्तर दिलं… अशी हॅन्ड टू हॅन्ड लढाई खूप कमी वेळा होते… बहुतेक एन्काऊन्टर्स एकमेकांपासून अंतर राखूनच होतात’, अशीही माहिती सूत्रांकडून मिळतेय.

अधिक वाचा  जर गद्दारी होत असेल तर…; उद्धव ठाकरेंनी मित्रपक्षांना दिला मोलाचा संदेश; लाँच केलं ‘मशाल गीत’