नवी दिल्ली: राजधानी दिल्लीत करोना विषाणूशी लढण्यासाठी दिल्ली सरकार कोणती पावलं उचलणार याबाबतची योजना मुख्यमंत्री अरविंद केजरीवाल यांनी जाहीर केले आहे. दिल्ली सरकारने या योजनेला 5T असे नाव दिले आहे. यात टेस्टिंग, ट्रेसिंग, ट्रीटमेंट, टीमवर्क आणि ट्रॅकिंग अॅण्ड मॉनिटरिंग यांचा समावेश आहे.
सध्या दिल्लीमध्ये करोनाची लागण झालेले ५०० रुग्ण आहेत. दिल्लीमध्ये ३० हजार करोनाग्रस्त आढळले तरी सरकार तयार असल्याचे केजरीवाल यांनी सांगितले. करोनाविरोधातील लढाईत डॉक्टर्स, नर्सेस हे महत्त्वाचे सैनिक आहेत. ते ज्या भागात राहतात तेथील शेजाऱ्यांनी त्यांच्याशी चांगली वागणूक दाखवावी असे आवाहन केजरीवाल यांनी केले आहे. दिल्लीचे मुख्यमंत्री अरविंद केजरीवाल यांनी एका व्हिडिओ संदेशाद्वारे आपले म्हणणे मांडले. आम्हाला करोनाच्या तीन पावले पुढेच राहायला हवे असे केजरीवाल म्हणाले. जर आपण झोपूनच राहिलो तर आपल्याला करोनावर नियंत्रण मिळवता येणार नाही, असे केजरीवाल म्हणाले. आपल्या 5T प्लानचे त्यांनी अर्थही सांगितले.
टेस्टिंग: टेस्टिंग झाल नाही तर किती घरांमध्ये करोनाचे रुग्ण आहेत, याबाबत कळू शकणार नाही. त्या मुळे टेस्टिंग महत्त्वाचे आहे असे केजरीवाल म्हणाले. दिल्ली सरकारने १ लाख रॅपिड टेस्टसाठी ऑर्डर दिली आहे. दिल्लीत लवकरच रॅपिड टेस्ट सुरू होणार आहे. यात मरकझ, दिलशाद गार्डन येथे अधिक रॅपिड टेस्ट होतील, असे केजरीवाल म्हणाले.
ट्रेसिंग: त्यानंतर पुढील टप्प्यात ट्रेसिंगचे काम होत आहे. १४ दिवसांमध्ये कोण करोना पॉझिटीव्ह आहेत हे ट्रेस केले जाईल. त्यानंतर त्यांना १४ दिवस घरीच राहण्याच्या सूचना दिल्या जातील. तसेच अशा लोकांनी कोणालाही भेटायचे नाही आहे. दिल्लीत सध्या उत्तम ट्रेसिंग सुरू आहे, असे केजरीवाल म्हणाले.
ट्रीटमेंट: जो लोक पॉझिटीव्ह आढळले अशांवर उपचार केले जात आहेत. एलएनजेपीमध्ये सध्या फक्त करोनावरच उपचार करण्यात येत आहेत. जीबी पंत येथेही फक्त करोनावरच उपचार होत आहेत. राजीव गांधी सुपर स्पेशॅलिटी हॉस्पिटलमधयेही केवळ करोनाच्या रुग्णांनाच पाहिले जात आहे. शासकीय रुग्णालयात २४५० बेड आणि खाजगी हॉस्पिटलमध्ये ४०० बेड करोनासाठी आरक्षित ठेवण्यात आल्याचे केजरीवाल म्हणाले.
टीम वर्क: कोणीही एकटे करोनाचा आजार बरा करू शकणार नाही. आज केंद्र आणि राज्य एकत्र मिळून काम करत आहेत आणि ही खूपच चांगली गोष्ट आहे, असे केजरीवाल म्हणाले. कोणते राज्य कोणते चांगले चांगले काम करत आहे हे राज्यांनी एकमेकांपासून शिकले पाहिजे. डॉक्टर आणि नर्स हे या लढाईतील सैनिक आहेत, त्यांच्या कुटुंबाची देखील काळजी घेतली पाहिजे. ते राहतात अशा ठिकाणी शेजाऱ्यांनी त्यांचयाशी चांगली वर्तणूक केली पाहिजे, असे केजरीवाल म्हणाले.
ट्रॅकिंग आणि मॉनिटरिंग: हे सांगितलेले ४ गोष्टींची योग्य प्रकारे अंमलबजावणी होत आहे की नाही याची जबाबदारी स्वत: मुख्यमंत्री केजरीवाल यांनी घेतली आहे. ही तयार करण्यात आलेली योजना कशी सुरू आहे यावर २४ तास नजर ठेवण्यात येत असल्याचेही केजरीवाल म्हणाले.

अधिक वाचा  “हे काम कोणी नालायकच करु शकतो”, हरभजन सिंग कोणावर खवळला?