मुंबई : अत्यावश्यक सेवेत कर्तव्य बजावता असलेल्या छत्रपती शिवाजी महाराज टर्मिनस येथील ५१ वर्षीय रेल्वे पोलिस कर्मचाऱ्याला करोनाची लागण झाल्याचे स्पष्ट झाले आहे. या रेल्वे कर्मचाऱ्याच्या पत्नीसह दोन मुलांनाही कस्तुरबा रुग्णालयात दाखल करण्यात आले आहे. विशेष म्हणजे, या पोलिसाच्या संपर्कात आलेल्या एकूण १५ रेल्वे पोलिसांनादेखील करोनाची लागण झाल्याचा संशय व्यक्त होत आहे.
करोनाबाधित कर्मचारी कल्याण, खडकपाडा येथे राहत असून ते सीएसएमटी रेल्वे पोलिस ठाण्यात नियुक्त होते. गेले काही दिवस त्यांना अस्वस्थ वाटू लागल्याने त्याची करोना चाचणी करण्यात आली. या चाचणीचा अहवाल सोमवारी, ३० मार्च रोजी आला. त्यामध्ये त्याला करोनाची लागण झाल्याचे निदान झाले. या कर्मचाऱ्याला कस्तुरबा रुग्णालयात दाखल करण्यात आले होते. त्याला सध्या सेव्हन हिल्स रुग्णालयात आणण्यात आले असून येथेच उपचार सुरू आहेत, असे पोलिसांनी स्पष्ट केले.
सीएसएमटी रेल्वे पोलिस ठाण्यातील हेड कॉन्स्टेबलला करोनाची लागण झाल्याचे अहवालात समोर आल्याच्या बातमीला रेल्वे पोलिस आयुक्त रवींद्र सेनगावकर यांनी दुजोरा दिला. दरम्यान, अन्य पोलिस कर्मचाऱ्यांना याची लागण होऊ नये, यासाठी खबरदारी घेण्यात येत असल्याचे त्यांनी सांगितले.
पोलिस रोज लाखो लोकांच्या संपर्कात येतात. यामुळे संसर्ग नेमका कसा झाला , याबाबत निश्चित सांगणे अशक्य आहे. संसर्ग टाळण्यासाठी करोनाबाधित रेल्वे पोलिसाच्या संपर्कात आलेल्या सीएसएमटी रेल्वे पोलिस ठाण्यातील एकूण १५ पोलिसांची यादी तयार करून त्यांची संपूर्ण माहिती आरोग्य विभागाला देण्यात आली आहे, असे सीएसएमटी येथील रेल्वे पोलिस अधिकाऱ्यांनी सांगितले.
..
मास्क, सॅनिटायझर कधी?
आरोग्य विभागाच्या अनेक रुग्णसेविका मास्क आणि सॅनिटायजरविनाच काम करत आहेत. त्यामुळे त्यांना करोनाची लागण होण्याची भीती व्यक्त करण्यात आली होती. आता रेल्वे पोलिसालाच करोनाची लागण झाल्याने ही भीती पुन्हा अधोरेखित झाली आहे. किमान आता तरी सर्व पोलिसांना मास्क आणि सॅनिटायझरचा नियमित पुरवठा व्हावा, अशी मागणी जोर धरू लागली आहे.

अधिक वाचा  लातूरच्या विकासासाठी ‘वाढपी हा आपल्या हक्काचा असला पाहिजे हक्काचा वाढपी दिल्लीत पाठवू…’ देशमुख