बिहारः दिल्ली, महाराष्ट्र, गुजरात आणि हरयाणातून उत्तर प्रदेश आणि बिहारचे अनेक मजूर आणि कामगार आपल्या गावी परतत आहेत. लॉकडाऊनमुळे खाण्या-पिण्याची आणि राहण्याची कुठलीही सोय नसल्याने ते गावी पायीच चालत निघाले. पण ते आपल्या गावी गेल्यावर आता वेगळीच समस्या निर्माण झाली आहे. महाराष्ट्रातून बिहारच्या सीतामढी जिल्ह्यात करोनाचे दोन संशियत आपल्या घरी परतले. पण त्यांची माहिती प्रशासनाला देणाऱ्या एका तरुणाला जीव गमवावा लागलाय.
बिहारच्या सीतामढी जिल्ह्यातील मधोल गावातल्या एका कुटुंबातले दोन जण महाराष्ट्रातून घरी परतले. या दोघांची माहिती गावातच राहणारा एक तरुण बबलू कुमार याने करोना हेल्पलाइनला दिली होती. यामुळे करोनाचे दोन्ही संशयित संतापले होते. आरोग्य विभागाला नमुने दिल्यानंतर त्यांनी कुटुंबातील इतर ५ जणांच्या साथीने बबलू याला बेदम मारहाण केली. यात बबलूचा मृत्यू झाला.
माहिती मिळताच पोलीस घटनास्थळी दाखल झाले. बबलूच्या हत्येप्रकरणी सर्व आरोपींना पोलिसांनी अटक करून पोलीस ठाण्यात नेले. पोलिसांनी सातही आरोपींविरोधात गुन्हा दाखल केला आहे. या प्रकरणी पोलिसांनी तपास सुरू केला असून गावात चौकशी करण्यात येत आहे.
इतर राज्यांमधून वस्त्या आणि गावांमध्ये आलेल्या नागरिकांची माहिती हेल्पलाइन सेंटर आणि प्रशासनाला द्यावी. यामुळे करोना संशयितांची तपासणी करण्यात येईल, असं आवाहन बिहार सरकारने नागरिकांना केलं आहे. पण माहिती देणाऱ्यांबाबत सरकारने काहीच स्पष्ट केलेलं नसल्याने इतरांच्या जीवाला धोका निर्माण झाला आहे.

अधिक वाचा  नाशिकचा शिवसेनेचा उमेदवार ठरला, हेमंत गोडसे किंवा भुजबळ नाही…या पदाधिकाऱ्यास मिळणार संधी