मुंबई: रेशनवरील धान्य खरेदी करण्यासाठी कोणत्याही प्रकारचा फॉर्म हा अन्न, नागरी पुरवठा विभागाकडून वितरीत करण्यात आलेला नाही. सध्या सोशल मीडिया व काही माध्यमांवरून अशा प्रकारचा बनावट फॉर्म प्रसिद्ध केला जात आहे. त्यात काहीही तथ्य नाही, असे अन्न, नागरी पुरवठा विभागाने स्पष्ट केले आहे. असा कोणताही निर्णय अन्न, नागरी पुरवठा विभागाकडून घेण्यात आलेला नसल्याने नागरिकांनी आपली फसवणूक टाळण्यासाठी असा कुठलाही फॉर्म भरून देऊ नये, असे आवाहन अन्न, नागरी पुरवठा विभागाच्या वतीने करण्यात आले आहे.
सोशल मीडियातून रेशनकार्ड नसलेल्या नागरिकांना मोफत धान्य मिळण्यासाठी फॉर्म उपलब्ध करून देण्यात आल्याच्या बातम्या पसरविल्या जात आहेत. मात्र, सरकारने असा कुठलाही निर्णय घेतलेला नाही, असे अन्न, नागरी पुरवठा विभागाने स्पष्ट केले आहे.
क्वारंटाइन शिक्का मारायला गेला, बेदम मारहाण
सध्या राज्यात करोनाच्या पार्श्वभूमीवर लॉकडाऊन जाहीर करण्यात आल्याने राज्यातील कुठलाही नागरिक उपाशी राहणार नाही, यासाठी शिवभोजन तसेच विविध योजना राज्याच्या अन्न ,नागरी पुरवठा विभाग व इतर विभागाकडून सुरु करण्यात आलेल्या आहेत. मात्र सोशल मीडियाच्या माध्यमातून अर्ज व चुकीचे वृत्ते प्रसारित करण्यात येत आहेत. अशा खोट्या बातम्यांमधून जनतेची फसवणूक होऊ शकते. त्यामुळे नागरिकांनी राज्यसरकारकडून कुठलीही अधिकृत माहिती आल्याशिवाय कुठलाही फॉर्म भरून देऊ नये, असे आवाहन विभागाने केले आहे.

अधिक वाचा  NEET कौन्सिलिंगबाबत मोठी अपडेट; सर्वोच्च न्यायालयाचा महत्त्वाचा निर्णय काय?