मुंबई- पंतप्रधान नरेंद्र मोदी यांनी देशात वाढणाऱ्या करोनाशी लढण्यासाठी देशातील जनतेला आर्थिक मदत करण्याचं आवाहन केल्यानंतर अनेक सेलिब्रिटींनी स्वतःहून आर्थिक मदत देऊ केली. या सगळ्यात बॉलिवूड अभिनेत्री अनुष्का शर्मा आणि भारतीय क्रिकेट संघाचा कर्णधार विराट कोहलीने आर्थिक मदतीसाठी पुढाकार घेतला नव्हता. यासाठी सोशल मीडियावर त्यांना ट्रोलही करण्यात आलं.
आता विराट आणि अनुष्काने पंतप्रधान सहाय्यता निधीमध्ये रकम जमा केली आहे. स्वतः विराट आणि अनुष्काने सोशल मीडियावर याबद्दल माहिती दिली. पण, त्यांनी किती रक्कम दिले हे मात्र सांगितले नाही.
विराटने ट्वीट करत म्हटलं की, मी आणि अनुष्काने पंतप्रधान सहाय्यता निधीमध्ये आमच्या परिने मदत केली आहे. करोनाग्रस्तांना पाहून आमचं हृदय तुटत आहे. या योगदानाचा हेतू करोना व्हायरसशी लढणाऱ्या गरिबांचं दुःख थोडं कमी करणं एवढाच आहे. विराटच्याआधी सचिन तेंडुलकर, अजिंक्य राहणे, अक्षय कुमार आणि अन्य अनेक बड्या सेलिब्रिटींनी आर्थिक मदत केली आहे.
अक्षय कुमारने २५ कोटी, टी- सीरिजचे भूषण कुमार यांनी १२ कोटी, बाहुबली फेम प्रभासने ४ कोटी, पवन कल्याणने २ कोटी, महेश बाबू, कार्तिक आर्यनने प्रत्येक १ कोटी, राम चरणने ७० लाख, रजनीकांत यांनी ५० लाख तर अलु अर्जुनने २५ लाखांची मदत केली आहे. याशिवा सलमान खानने सिनेसृष्टीत दिवसावर काम करणाऱ्या २५ हजार कर्मचाऱ्यांचा आर्थिक खर्च उचलला आहे.

अधिक वाचा  अखेर आतुरता संपली; ‘नवरा माझा नवसाचा 2’ या दिवशी येणार प्रेक्षकांच्या भेटीला