नागपूर: करोनाच्या पार्श्वभूमीवर विलगीकरण केलेल्यांची यादी सोशल मीडियातून व्हायरल झाल्याने शहरात एकच गोंधळ उडाला. प्रत्येकजण आपापल्या भागातील कुणाची नावे आहेत, त्याचा शोध घेऊ लागला. शेजारची नावे बघून आश्चर्य वाटू लागले. ‘आमचा बाल्या त्याच्याच संगं खेळत होता, काही होईन तं नाही त्याले’, अशा काळजीयुक्त विचारणांनी वातावरण तंग केले होते.
नागपुरात सध्या करोनाचीच चर्चा आहे. रोज किती लोकांचे नमुने घेतले, कितींचे तपासले, कितींना सुटी झाली याचे आकडे प्रसृत केले जातात. त्यांची नावे उघड होत नाहीत. कोण असेल? कुणाला झाला असेल? अशी चर्चा रंगत राहतेच. त्या पार्श्वभूमीवर शुक्रवारी रात्री करोना संशयितांची पोलिस ठाणेनिहाय एक यादी सोशल मीडियावर व्हायरल झाली. एकाने दुसऱ्याला, दुसऱ्याने तिसऱ्याला ती पाठवली. बघता बघता ती सगळीकडे गेली. प्रत्येकजण आपआपल्या भागातील नावे शोधू लागला. ‘अरे हे तर आपल्या शेजारीच राहतात, ते तर दोन गल्ल्या सोडून राहतात. त्यांची मुले त्याच बागेत येतात, जिथे आम्ही जातो. त्यांच्या मुलांसोबत आमची मुले खेळत होती, त्यांना काही होणार तर नाही ना?’ अशी भीती व्यक्त केली जात होती. उशिरा ती बनावट यादी असल्याचे संदेश आले. मात्र, पोलिस ठाणेनिहाय नाव व पत्ते कोण पाठविणार? ही प्रशासकीयच यादी असेल, कुणाच्या तरी चुकीने बाहेर आली असेल, अशी चर्चा सुरू होती.
या यादीने उडवून दिलेला गोंधळ, शनिवारी सकाळीदेखील कायम होता. यादीतील सर्वाधिक नावे ही प्रतापनगर पोलिस स्टेशनअंतर्गत येणाऱ्या वसाहतींमधील आहेत. त्यामुळे या भागातील नागरिकांमध्ये या चर्चांना अधिकच जोर चढला होता. यादीतील व्यक्तींकडे कुणाची तरी मुले खेळायला गेली होती, त्या व्यक्तीच्या आम्ही संपर्कात आलो होतो, असेही संदेश फिरत होते. त्यामुळेही नागरिकांच्या मनात शंकेने घर केले होते.
नागपूरबाहेरही व्हायरल
केवळ नागपुरातच नव्हे तर नागपूरबाहेरही ही यादी व्हायरल झाली आहे. विविध शहरांमधील व्हॉट्सअॅप ग्रुपवर शुक्रवारी आणि शनिवारी ही यादी फिरत होती. त्या शहरांतील लोकांनी पुन्हा ती यादी आपल्या नागपुरातील आप्तेष्टांना पाठविणे, असा प्रकार सतत सुरू होता. त्यामुळे नागरिकांच्या चिंतेत सातत्याने भर पडत होती.
यादीमागे कोण?
ज्या संशयितांना स्वत:च्या घरात वेगळे केले होते, ते वेगळे न राहता समाजात मिसळत होते. बाजारात फिरत होते. त्यांच्यापासून इतरांना धोका होता म्हणून प्रशासनानेच ही यादी फोडली असावी, अशी चर्चा सुरू होती. त्यासंदर्भात माहिती घेतली असता, त्यांनी इन्कार केला. ही यादी आली कशी आणि त्याचा उद्देश काय? याबाबतचे गूढ कायमच आहे.
बडी नावे
संशयितांच्या यादीमध्ये अनेक मोठी नावे आहेत. काही बड्या व्यापाऱ्यांचे परिवार, राजकीय नेत्यांचे नातलग, प्रतिष्ठित व्यक्तींचा परिवार त्यात समाविष्ट आहे. त्यामुळे या यादीबाबत अधिक चर्चा होत आहे.
