सिंगापूर: जगभरात करोनाचा संसर्ग फैलावला आहे. जगातील सुमारे दोन लाख जणांना करोनाचा संसर्ग झाला आहे. करोनावर मात करण्याचे प्रयत्न सुरू आहेत. तर, दुसरीकडे काही देशांनी प्रतिबंधकात्मक उपाययोजना आखून करोनावर नियंत्रण मिळवण्याचे प्रयत्न केले आहेत. त्यामध्ये बऱ्यापैकी यशही मिळाले आहेत.
काही उपाययोजना आखल्यामुळे सिंगापूरसारख्या लहान देशांनी करोनाच्या संसर्गावर नियंत्रण मिळवले आहे. सिंगापूरमध्ये एकाही रुग्णाचा मृत्यू झाला नाही. सिंगापूरने रुग्णांची ओळख पटवणे, त्यांना वेगळे ठेवणे आणि लोकांशी संवाद साधण्यावर भर दिला. त्याच्या परिणामी लोकांमध्ये जागरुकताही निर्माण झाली. सिंगापूरमध्ये सार्वजनिक आरोग्य व्यवस्था बळकट असल्यामुळे सर्वच स्तरातील रुग्णांना त्याचा फायदा झाला. सिंगापूरमध्ये करोनाबाधित म्हणून दाखल झालेल्या रुग्णांपैकी बहुतांंशी रुग्णांवर यशस्वी उपचार करण्यात आले आहेत. सार्सच्या संसर्गानंतर सिंगापूरने आपली आरोग्यसेवा अधिक बळकट केली.

अधिक वाचा  नगरसेवक दिलीप वेडेपाटील यांच्याकडून शाळेच्या पहिल्या दिवशीच अनोखी भेट देऊन स्वागत

सिंगापूरमध्ये करोनाचा रुग्ण कधी आढळला?
सिंगापूरमध्ये २३ जानेवारी २०२० रोजी करोनाचा पहिला रुग्ण आढळला. एका ६६ वर्षीय वृ्द्धाला करोनाची लागण झाल्याचे आढळून आले. ही व्यक्ती चीनमधील वुहान शहरातून सिंगापूरमध्ये दाखल झाली होती.
सिंगापूरमधील प्रशासनाने काय उपाययोजना आखल्या?
प्रशासनाने काही उपाययोजना आखल्या. यामध्ये करोनाचे संशयित आणि बाधा झालेले रुग्ण शोधण्यात आले. त्यांना आयसोलेशनमध्ये ठेवण्यात आले व नियमित तपासणी करण्यात आली. त्याचवेळी सार्वजनिक आरोग्य व्यवस्थेने महत्त्वाची भूमिका बजावली. सक्षम असणाऱ्या सार्वजनिक आरोग्य व्यवस्थेमुळे नागरिकांना मोठा दिलासा मिळाला.
सिंगापूरमध्ये करोनाबाधित किती रुग्ण व मृत्यू ?
फेब्रुवारी महिन्याच्या मध्यापर्यंत ४७ रुग्णांची नोंद करण्यात आली. तर, १८ मार्चपर्यंत २६६ जणांना करोनाची लागण झाली. त्यात करोनामुळे एकाही मृत्यूची नोंद नाही. तर, ११४ जणांवर यशस्वीपणे उपचार करण्यात आले. रुग्णांची संख्या वाढल्यानंतर सरकारने क्वारंटाईन आणखी सक्तीचे करण्याचे आदेश दिले.
सार्सच्या संसर्गावेळी काय स्थिती होती?
सिंगापूर, तैवान आणि हाँगकाँग आदी देशांमध्ये २००३मधील सार्सच्या संसर्गाने मोठे नुकसान केले होते. जवळपास ८००० हजार जणांना याची लागण झाली होती. तर, ८०० जणांचा मृत्यू झाला होता. त्यावेळचा अनुभव करोना संसर्गाला अटकाव करण्यासाठी कामी आला असल्याचे तज्ञांनी म्हटले आहे.
सिंगापूरने सार्सनंतर काय उपाययोजना आखली?
सार्सच्या उद्रेकामुळे सिंगापूरमध्ये २३८ जणांना संसर्ग झाला होता. तर, ३३ जणांचा मृत्यू झाला. या घटनेनंतर सिंगापूरने आपली आरोग्य सेवा आणखी बळकट केली. भविष्यात एखाद्या आजाराचा उद्रेक होऊ नये यासाठी काही प्रोटोकॉल ठरवले. संसर्गजन्य आजारांना दूर ठेवण्यासाठी यंत्रसामग्रीची गुंतवणूक आणि संसर्गजन्य रोगांवर उपचार करण्यासाठी सुधारित प्रशिक्षण यासाठी “फिव्हर सेंटर” स्थापन केली. ज्यावेळी करोनाचा पहिला रुग्ण आढळला त्यावेळी सिंगापूर सज्ज होते.