भारताचा माजी कर्णधार महेंद्रसिंग धोनीचे आंतरराष्ट्रीय क्रिकेटमधील पुनरागमन आता अशक्य आहे, असे मत भारताचा माजी तडफदार सलामीवीर वीरेंद्र सेहवागने व्यक्त केले आहे. आयपीएलवर धोनीचे आंतरराष्ट्रीय क्रिकेटमधील भवितव्य अवलंबून आहे, असे भारताचे मुख्य प्रशिक्षक रवी शास्त्री यांनीही काही दिवसांपूर्वी म्हटले होते. पण आता आयपीएल पुढे ढकलल्यावर धोनीचे काय होणार, याची उत्सुकता चाहत्यांना आहे. पण आयपीएल स्पर्धा झाली तरी धोनीचे भारतीय संघात पुनरागमन होऊ शकत नाही, असे मत सेहवागने व्यक्त केले आहे.
याबाबत सेहवाग म्हणाला की, ” जेव्हा निवड समिती एका खेळाडूला सोडून पुढे जाते. तेव्हा त्याच्या नावाचा विचार ते करताना दिसत नाही. जरी धोनीने आयपीएलमध्ये चांगली कामगिरी केली तर धोनीला भारतीय संघात स्थान मिळण्याची शक्यता फार कमी आहे. कारण आता ट्वेन्टी-२० क्रिकेटमध्ये लोकेश राहुल आणि रिषभ पंत हे दोघे यष्टीरक्षण करताना दिसत आहेत. त्यामुळे निवड समिती ट्वेन्टी-२० विश्वचषक पाहता त्यांच्या नावाला अधिक पसंती देऊ शकते. त्यामुळे या दोघांना बाजूला सारून निवड समिती ट्वेन्टी-२० विश्वचषकासाठी धोनीच्या नावाचा विचार करेल, असे मला तरी वाटत नाही. त्यामुळे धोनीचे भारतीय संघातील पुनरागमन असंभव असल्याचे मला वाटते.”
आयपीएल स्पर्धेत यावेळी सर्वांना उत्सुकता होती ती महेंद्र सिंह धोनीच्या पुनरागमनाची. गेल्या वर्षी इंग्लंडमध्ये झालेल्या वर्ल्ड कप स्पर्धेनंतर धोनीने क्रिकेटपासून दूर राहण्याचा निर्णय घेतला होता. त्यानंतर धोनीने आयपीएल स्पर्धेत खेळण्याचा निर्णय घेतला होता. त्यासाठी चेन्नईत त्याने १ मार्चपासून सराव देखील सुरू केला. पण करोनामुळे आयपीएल स्पर्धा पुढे ढकलण्यात आली.

अधिक वाचा  शिवसेनेतून बाहेर पडणार का? विजय शिवतारेंचं मोठं विधान; म्हणाले, होय त्यांना…