नवी दिल्ली : देशात करोना व्हायरसबाधित रुग्णांची वाढती संख्या प्रत्येकाची चिंता वाढवणारी ठरतेय. याच दरम्यान ‘रिझर्व्ह बँक ऑफ’ (reserve bank of india) इंडियानं नागरिकांना पेमेंट करताना नोटांचा वापर टाळण्याचा सल्ला दिलाय. एखाद्याला पेमेंट करताना नोटांऐवजी डिजिटल पेमेंट पर्यायांचा वापर करा, असं आरबीआयनं म्हटलंय. वस्तू किंवा सेवांच्या खरेदीसाठी बिलाचं पेमेंट तसंच फंड ट्रान्सफरसाठी एनईएफटी, आयएमपीएस, यूपीआय आणि बीबीपीएस यांसारख्या पर्यायांचा २४ तास वापर करत येईल, असं रिझर्व्ह बँकेनं सूचित केलं आहे.
‘पेमेंटसाठी नागरिक आपल्या उपयुक्ततेनुसार, मोबाईल बँकिंग, इंटरनेट बँकिंग, कार्ड यांसारख्या डिजिटल पेमेंट पर्यांयांचा वापर करू शकतात. यामुळे पैसे काढण्यासाठी किंवा बिल चुकविण्यासाठी गर्दीच्या ठिकाणी जाणं ते टाळू शकतील’ असं आरबीआयनं म्हटलं.
चीनच्या वुहान शहरातून सुरुवात झालेल्या करोनाच्या विषाणूनं जवळपास जगभरात हात-पाय पसरलेत. जगभारात जवळपास या व्हायरसच्या संक्रमणामुळे ७००० हून अधिक जणांनी आपले प्राण गमावलेत तर हजारो लोकांच्या शरिरात करोनाच्या विषाणूनं प्रवेश मिळवलाय. भारतात करोनाबाधित रुग्णांची संख्या ११४ वर पोहचल्याची माहिती आरोग्य मंत्रालयाकडून देण्यात आलीय. तसंच हैदराबादमध्ये आणखीन एक रुग्ण सापडल्याचं समजतंय. देशभरातील अनेक राज्यांत शाळा, महाविद्यालय, मॉल, जलतरण तलाव, जिम, सिनेमाघरं ३१ मार्चपर्यंत बंद करण्याचे आदेश देण्यात आलेत. आंतरराष्ट्रीय उड्डाण सेवा बंद करण्यात आलीय. रेल्वे स्टेशन तसंच रेल्वेंचं निर्जंतुकीकरण सुरू आहे.
