मुंबई; येस बँक घोटाळ्यात अंमलबजावणी संचालनालयाने (ईडी) ११ मोठ्या उद्योग समुहांवर लक्ष केंद्रीत केले आहे. या ११ समुहांनी बँकेकडून ४२ हजार १३६ कोटी रुपयांचे कर्ज घेऊन ते बुडवले आहे. यामध्ये परदेशी रक्कमेचा गैरवापर होऊन ‘मनी लॉन्डरिंग’ केल्याचा ईडीचा संशय आहे.
तोट्यात गेलेल्या येस बँकेचे संस्थापक राणा कपूर यांना ‘ईडी’ ने घोटाळ्याच्या चौकशीसाठी अटक केली आहे. कपूर यांनी परदेशी पैशांचा गैरवापर करीत काही उद्योग समुहांना कर्ज दिल्याचे चौकशीदरम्यान समोर आले. ते कर्ज बुडित खात्यात गेले आहे. त्यामुळे या उद्योग समुहांवर आता ‘ईडी’ने लक्ष केंद्रीत केले आहे. त्यांची चौकशी सुरू झाल्याचे सूत्रांनी सांगितले. ही चौकशी या घोटाळ्यातील पुढील तपसासाठी महत्त्वाची असेल, असे इन्व्हेस्टर ग्रीव्हन्स फोरमचे किरीट सोमय्या यांनी सांगितले
या मोठ्या बुडीत कर्जांमध्ये सर्वाधिक १२ हजार ८०८ कोटी रुपयांचे कर्ज प्रसिद्ध उद्योजक अनिल अंबानी यांच्या अनिल धिरुभाई अंबानी समुहाला (एडीएजी) देण्यात आले. या समुहातील दहा कंपन्यांना हे कर्ज देण्यात आले. ती सर्व कर्जखाती बुडीत खात्यात गेली. यापाठोपाठ ८४१५ कोटी रुपये एस्सेल समुहाला देण्यात आले. समुहातील एकूण १६ कंपन्यांना कर्ज वाटप करण्यात आले. याखेरीज घोटाळा झालेली दिवाण हौसिंग फायनान्स कंपनी (डीएचएफएल), आयएल अॅण्ड एफएस समूह, इंडिया बूल्स, खेतान समूह यांचाही या बुडित कर्जखात्यांमध्ये समावेश आहे.
जेट एअरवेज ही विमानसेवा कंपनी अलीकडेच बंद पडल्याने चांगलीच चर्चेत आली. कंपनीच्या डोक्यावर जवळपास ९ हजार कोटी रुपयांचे कर्ज आहे. त्यापैकी ११०० कोटी रुपयांचे कर्ज त्यांनी येस बँकेकडूनही घेतले आहे. ते कर्जखातेही बुडीत खात्यात गेले आहे. विशेष म्हणजे, परदेशी पैशांचा गैरवापर केल्याबद्दल जेट एअरवेजचे संस्थापक नरेश गोयल व त्यांच्या पत्नी अनिता यांची ईडीकडून चौकशी सुरूच आहे. त्यामुळे आता या प्रकरणात आता जेट एअरवेजची ईडी नव्याने कशाप्रकारे चौकशी करणार? हे औत्सुक्याचे आहे.
अशी आहेत कर्जखाती (कोटी रुपयांत)

अधिक वाचा  सभागृहात १०हजार कोटी घोटाळ्यांची चर्चा अन् टेंडरविना ‘HLL’ला 2000 कोटींचं कंत्राट; आरोग्यमंत्र्यांची चलाखी

एडीएजी : १२८०८

एस्सेल ग्रूप : ८४१५

जेट एअरवेज : ११००

इंडिया बुल्स : ५८००

डीएचएफएल : ४७३५

ओमकार : २७१०

आयएल अॅण्ड एफएस : २५६८

खेतान : १२५०

रेडियस : १२००

केळकर : १०५०

थापर : ५००