नवी दिल्ली : मध्य प्रदेशात राजकीय संकट घोंघावतंय. जयपूरमधून भोपाळला परतलेल्या काँग्रेस आमदारांना कोर्टयार्ड मेरिएट हॉटेलमध्ये ठेवण्यात आलंय. दुसरीकडे भाजपनं आपल्या आमदारांना मानेसर गुरुग्रामच्या एका हॉटेलमध्ये ठेवलंय. भाजपचे ज्येष्ठ नेते आणि माजी मुख्यमंत्री शिवराज सिंह चौहान यांनी रविवार या आमदारांची भेट घेतली. कमलनाथ सरकारनं विश्वास गमावलाय, हे सरकार निश्चितपणे कोसळणार, असा दावा या भेटीनंतर शिवराज सिंह चौहान यांनी माध्यमांसमोर केला.
गुरुग्रामच्या हॉटेल आयटीसी ग्रॅन्ड मध्ये मध्य प्रदेश भाजपचे १०६ आमदार उपस्थित आहेत. शिवराज यांनी या आमदारांची भेट घेत सोमवारी होणाऱ्या संभ्याव्य विश्वासदर्शक ठरावासाठी रणनिती आखलीय. आमदारांनी विश्वासदर्शक ठरावासाठी कधी जायचं, हे आम्ही ठरवू असंही त्यांनी म्हटलं.
दरम्यान, भाजप आमदारांनी मध्य प्रदेशचे भाजप नेते कैलास विजयवर्गीय आणि राकेश सिंह यांचीही भेट घेतली. यापूर्वी, शिवराज यांनी दिल्लीत भाजपच्या केंद्रीय नेतृत्वाची भेटही घेतली. ही बैठक केंद्रीय मंत्री आणि भाजपचे नेते नरेंद्र सिंह तोमर यांच्या घरी पार पडली. यात मध्य प्रदेशचे माजी मुख्यमंत्री शिवराज सिंह चौहान, केंद्रीय मंत्री धर्मेंद्र प्रधान तसंच काँग्रेसमधून नुकतेच भाजपमध्ये दाखल झालेले ज्योतिरादित्य शिंदे हेदेखील उपस्थित होते.
ज्योतिरादित्य शिंदे समर्थक २२ आमदारांमधले अनेक आमदार बंगळुरुमध्येच आहेत. विधानसभा अध्यक्षांनी या २२ आमदारांपैंकी सहा जणांचा राजीनामा शनिवारी सायंकाळी उशिरा मंजूर केला. उरलेल्या १६ आमदारांच्या राजीनाम्यावर अद्याप निर्णय घेण्यात आलेला नाही.

अधिक वाचा  भाजपने मेधा कुलकर्णी यांना का दिली उमेदवारी? आता बदलणार पुणे लोकसभेची गणिते