मुंबई- येस बँक या खासगी बँकेची अवस्था फारशी चांगली नाही. भारतीय रिजर्व्ह बँकेकडून येस बँकेवर एक महिना फक्त ५० हजार रुपये काढण्याची सक्ती केली आहे. येस बँकेवर आलेल्या या संकटावर सर्वसामान्यांपासून ते बॉलिवूड सेलिब्रिटींपर्यंत सारेच ट्वीट करत आहेत. दरम्यान, येस बँकेवर ओढवलेल्या या संकटाला अर्जुन कपूर जबाबदार असल्याचं अभिनेता कमाल आर खानने म्हटलं.
केआरके म्हणाला की, २ स्टेट या सिनेमात अर्जुनला येस बँकमध्ये काम करणारा कर्मचारी दाखवण्यात आलं होतं. याचमुळे येस बँक बुडाली. केआरकेचं हे ट्वीट सध्या सोशल मीडियावर तुफान व्हायरल होत आहे.
कमाल खानने ट्वीटमध्ये लिहिले की, ‘अर्जुन कपूरने आतापर्यंत ज्या सिनेमांमध्ये काम केलं, ते सारेच सिनेमे फ्लॉप ठरले. एकमेव सुपरहिट सिनेमा होता तो म्हणजे २ स्टेट. अर्जुनला या सिनेमात येस बँकमध्ये काम करणारा कर्मचारी दाखवण्यात आलं होतं. आता तर येस बँकही बुडाली.’ केआरकेच्या या ट्वीटवर युझर्स त्यांच्या प्रतिक्रियाही देत आहेत.
दरम्यान, आरबीआयने येस बँकेचे बोर्ड विलीन करून त्यावर स्वतंत्र प्रशासक नेमले. यासोबतच बँक ठेवीदारांना पैसे काढण्याच्या मर्यादेसह बँकेच्या व्यवसायावरही अनेक निर्बंध लादले गेले आहेत. केंद्रीय बँकेने पुढील आदेशांपर्यंत ठेवीदारांना पैसे काढण्याची मर्यादा ५० हजार रुपये केली आहे.
असं म्हटलं जातं की, येस बँकेची आर्थिक परिस्थिती बऱ्याच दिवसांपासून खराब असून अनेक दिवसांपासून बँक फण्ड गोळा करण्याचा प्रयत्न करत होती. दरम्यान, बँकेची अवस्था इतकी खराब झाली की अवघ्या १५ महिन्यांमध्ये बँकेच्या गुंतवणूकदारांना ९० टक्क्याहून अधिक नुकसान झालं.