ज्योतिरादित्य शिंदे यांनी काँग्रेसला रामराम ठोकलाय. त्यानंतर ते भाजपच्या गोटात दिसत आहेत. मंगळवारी ज्योतिरादित्य शिंदे यांनी पंतप्रधान नरेंद्र मोदी आणि गृह मंत्री अमित शहा यांची भेट घेतल्यानंतर या शक्यता सत्यात उतरण्याची चिन्हं दिसू लागली. ज्योतिरादित्य शिंदे आज भाजपमध्ये प्रवेश करणार असल्याचं सांगण्यात येतंय. त्यांच्यासोबत काँग्रेसच्या २२ समर्थक आमदारांनीही राजीनामे दिले आहेत. दुसरीकडे, मध्य प्रदेशातील कमलनाथ सरकार पडणार नाही, असा दावा काँग्रेस आमदार अर्जुन सिंह यांनी केलाय. मात्र, या दरम्यान सोशल मीडियावर मात्र काँग्रेस आणि ज्योतिरादित्य यांच्या कुटुंबाची जवळीक साधणारे फोटो व्हायरल झालेले दिसले. सोशल मीडियावर अनेक असे फोटो दिसू लागले ज्यामध्ये ज्योतिरादित्य आपल्या बालपणी वडील माधवराव शिंदे यांच्यासोबत दिसत होते ‘या’ नेत्याने घडवली मोदी-जोतिरादित्य शिंदेंची भेट
ज्योतिरादित्य शिंदे यांचे फोटो माधवराव शिंदे यांचे काही जुने फोटो सोशल मीडियावर झळकताना दिसत आहेत. याद्वारे माधवराव शिंदे आणि काँग्रेस जवळीक तसंच शिंदे यांचे राजीव गांधी यांच्याशी असणारे मैत्रीचे संबंध यांची आठवण केली जातेय. माधवराव शिंदे आणि राजीव गांधी यांच्या मैत्रीचे अनेक फोटो आणि किस्से सोशल मीडियावर दिसत आहेत. माधवराव हे राजीव गांधी यांचे सर्वात जवळच्या नेत्यांपैंकी एक मानले जात होते. राजकीय वर्तुळात त्यांचा दबदबा होता.
विजयाराजेंची राजकीय कारकीर्द
ग्वाल्हेरच्या राजमाता विजयाराजे शिंदे यांनी काँग्रेसमधून आपल्या राजकीय कारकीर्दीला सुरुवात केली होती. १९५७ मध्ये त्या गुणा मतदारसंघातून निवडून आल्या. पण १० वर्षांतच १९६७ साली त्यांनी काँग्रेसला सोडचिठ्ठी दिली. त्यांच्या या बंडामुळे काँग्रेसचे तत्कालीन सरकार कोसळले होते. त्यानंतर विजयाराजे यांच्या कार्यकाळात ग्वाल्हेर आणि परिसरात जनसंघाची पाळंमुळं रुजली. विजयाराजेंचे पुत्र माधवराव यांनीही जनसंघातून आपल्या राजकीय कारकीर्दीची सुरुवात केली.
माधवरावांची राजकीय सुरुवात जनसंघातून
माधवराव शिंदे आपल्या आई-वडिलांचा एकुलता एक मुलगा होता. चार बहिणींमध्ये ते आई-वडिलांचं तिसरं अपत्य होते. केवळ २६ वर्षांचे असताना माधवराव शिंदे यांना खासदार म्हणून निवडून येण्याचं भाग्य लाभलं होतं. खुद्द अटल बिहारी वाजपेयी यांनी १०१ रुपयांची पावती फाडून माधवराव शिंदे यांना जनसंघाचा सदस्य बनवलं होतं. यावेळी ते केवळ २५ वर्षांचे होते. परंतु, दीर्घकाळ ते जनसंघासोबत राहू शकले नाहीत… आणि त्यानंतर त्यांनी काँग्रेसचा हात धरला. १९८४ मध्ये त्यांनी ग्वाल्हेर मतदारसंघातून अटल बिहारी वाजपेयी यांना पराभवाचा धक्का दिला होता.
ज्योतिरादित्य लहानपणी भाषण करताना
१९७७ मध्ये आणीबाणीनंतर जनसंघ आणि आपली आई विजयाराजे शिंदे यांच्यापासून माधवराव शिंदे विभक्त झाले. १९८० मध्ये माधवराव शिंदे यांनी काँग्रेसच्या तिकिटावर निवडणूक लढली आणि ही निवडणूक जिंकून त्यांनी केंद्रात मंत्रीपदही मिळवलं. माधवराव शिंदे काँग्रेसमध्ये कार्यरत असताना अनेकदा ज्योतिरादित्य त्यांच्यासोबत अनेक सभांना हजेरी लावताना दिसायचे. ज्योतिरादित्य यांचा लहानपणीचा एका सभेत बोलत असतानाचा एक फोटोही सोशल मीडियावर सध्या दिसतोय.
राजकीय वारसा
२००१ साली माधवराव शिंदे यांचं एका विमान अपघातात निधन झालं. ज्योतिरादित्य शिंदे हे माधवराव शिंदेंच्या पावलावर पाऊल टाकत राजकारणात आले आणि आपल्या वडिलांचा राजकीय वारसा यशस्वीपणे पुढेही नेला. गुणा मतदार संघातून ते निवडून आले. २०१९ च्या लोकसभा निवडणुकीत मात्र त्यांना पराभवाची चव चाखावी लागली. राहुल गांधी यांचे निकटवर्तीय आणि चार वेळा खासदार असलेले ४९ वर्षीय ज्योतिरादित्य यांनी काँग्रेसला रामराम ठोकल्यानंतर पक्षातील ज्येष्ठ आणि तरुण नेत्यांमधील सत्तासंघर्ष पुन्हा अधोरेखित झाला आहे. याच सत्तासंघर्षाचा झटका ज्योतिरादित्य यांना निवडणुकीत बसला होता.
काँग्रेसला झटका
पूर्वीच्या ग्वाल्हेर राजघराण्याचे वंशज असलेले ज्योतिरादित्य शिंदे यांची काँग्रेसला सोडचिठ्ठी आणि भाजपच्या दिशेने वाटचाल म्हणजे ‘घरवापसी’ असल्याची प्रतिक्रिया त्यांची आत्या आणि भाजप नेत्या यशोधरा राजे यांनी दिली आहे. तर ज्याप्रमाणे माधवराव शिंदे राजीव गांधींसोबत दिसत त्याचप्रमाणे आत्ताआत्तापर्यंत ज्योतिरादित्य शिंदेही राहुल गांधी यांच्यासोबत दिसत होते, अशी आठवण नेटकऱ्यांनी करून दिलीय. परंतु, ज्योतिरादित्य शिंदे यांच्या काँग्रेस सोडण्याच्या निर्णयानं काँग्रेसला मात्र जोरदार झटका बसणार आहे.
