जयपूरः ज्योतिरादित्य शिंदे यांनी आज भाजपमध्ये प्रवेश केला. त्यावर काँग्रेसचे युवा नेते आणि राजस्थानचे उपमुख्यमंत्री सचिन पायलट यांनी अखेर मौन सोडलंय. ज्योतिरादित्य शिंदेंचा निर्णय चुकीचा आणि दुर्देवी आहे, असं सचिन पायलट म्हणाले. ज्योतिरादित्य यांनी काँग्रेसचा राजीनामा दिल्यानंतर सचिन पायलट हे चर्चेत आले होते.
राहुल गांधींच्या यंग ब्रिगेडमधील प्रमुख चेहरा असलेल्या सचिन पायलट यांनी ज्योतिरादित्य शिंदे यांच्या भाजप प्रवेशावर ट्विट केलंय. ज्योतिरादित्य शिंदे यांनी काँग्रेस सोडून दुसऱ्या मार्गावर जाणं हे दुर्दैवी आहे. पक्षात चर्चेतून वादावर तोडगा काढता आला असता, असं सचिन पायलट म्हणाले.
मध्य प्रदेशातील राजकीय अस्थिरता संपणार
मध्ये प्रदेशातील राजकीय अस्थिरतेवर लवकरच मार्ग निघेल. मुख्यमंत्री कमलनाथ सरकारवरील संकट दूर होईल. सर्व प्रमुख नेते मतभेद दूर करण्याच्या प्रयत्नात आहेत. निवडणुकीत दिलेली आश्वासनं पूर्ण करण्यासाठी मध्य प्रदेशला एका स्थिर सरकारची गरज आहे, असं सचिन पायलट म्हणाले.
राहुल गांधी म्हणाले, ज्योतिरादित्य एकमेव नेते होते जे…
ज्योतिरादित्य शिंदे हे एकमेव असे नेते जे माझ्या घरात बिनधास्तपणे वावरू शकत होते, अशी प्रतिक्रिया राहुल गांधी यांनी ज्योतिरादित्य यांच्या भाजप प्रवेशावर दिलीय.
भाजपमध्ये प्रवेश करताच राज्यसभेची उमेदवारी
ज्योतिरादित्य शिंदे यांनी भाजपमध्ये प्रवेश करताच काही तासांमध्ये त्यांना राज्यसभेची उमेदवारी जाहीर झाली. त्यांना भाजपने मध्य प्रदेशातून राज्यसभेची उमेदवारी दिलीय. भाजपने राज्यसभा निवडणुकीसाठी ११ उमेदवारांची यादी जाहीर केली. त्यात ज्योतिरादित्य शिंदेंचा समावेश आहे.

अधिक वाचा  पुणेकरांचा आनंद दुहेरी; मोदीजीची तिहेरी शपथ अन् मुरली(अण्णा)ही सोबत