भोपाळः ज्योतिरादित्य शिंदेंच्या राजीनाम्यानंतरही मुख्यमंत्री कमलनाथ माघार घेण्यास तयार नाहीत. २२ आमदारांनी आपले राजीनामे विधानसभा अध्यक्षांकडे दिल्यानंतर मुख्यमंत्री कमलनाथ यांनी तातडीने काँग्रेसच्या विधिमंडळ पक्षाची बैठक बोलावली होती. कमलनाथ सरकारला कुठलाही धोका नाही. आमच्याकडे अजूनही बहुमत आहे, असा दावा काँग्रेस नेते पी.सी. शर्मा आणि शोभा ओझा यांनी या बैठकीनंतर केला.
कुठलीही चिंता करण्याचं कारणा नाही. आपण विधानसभेत बहुमत सिद्ध करू. आपलं सरकार पाच वर्षांचा कार्यकाळ पूर्ण करेल, असा विश्वास कमलनाथ यांनी काँग्रेस विधिमंडळ पक्षाच्या बैठकीत व्यक्त केला.
कमलनाथ हे नाराज आमदारांना परत आणण्याच्या प्रयत्नात आहेत. कर्नाटक असलेल्या नाराज आमदारांची मनधरणी करण्यासाठी कमलनाथ हे सज्जन सिंह वर्मा, गोविंद सिंह यांच्यासह आणखी एका जणाला बेंगळुरूला पाठवत आहेत. तिसरी व्यक्ती राजकारणातील नाहीए. हे तीन जण नाराज आमदारांचे मन वळवणार आहेत. दरम्यान, काँग्रेस आमदारांना फसवून त्यांचे राजीनामे घेतले गेल्याचा आरोप, पक्षाचे नेते पी.सी. शर्मा यांनी केलाय. राज्यसभेची उमेदवारीसाठी ज्योतिरादित्य शिंदेंना पाठिंब देण्याच्या नावाखाली आमदारांना फसवण्यात आलं. राजीनामा पत्रावर आमदारांची सही घेतली गेली, असं काँग्रेसच्या शोभा ओझा म्हणाल्या.
९४ आमदार बैठकीत उपस्थित
कमलनाथ सरकार सुरक्षित आहेत. बहुमतावेळी काँग्रेस आमदार कमलनाथ सरकारलाच मत देतील. कमलनाथ यांनी बोलावलेल्या विधिमंडळ पक्षाच्या बैठकीला ९४ आमदार उपस्थित होते, अशी माहिती काही आमदारांनी दिली. आमदारांनी निर्भिड रहावं आणि एकजुटीने मतदान करावं, असं आवाहन मुख्यमंत्री कमलनाथ यांनी केल्याचं ओझा म्हणाल्या. काँग्रेस आमदारांनास कुठेही एकत्र नेलं जाणार नाही. कुठलाही आमदार स्वतःहून विधानसभा अध्यक्षांकडे राजीनाम देत नाही तोपर्यंत तो ग्राह्य धरला जणार नाही, असं कमलनाथ यांनी बैठकीत आमदारांना स्पष्ट केलं. दरम्यान, मध्य प्रदेशातील भाजप आमदारांना दिल्लीला रवाना करण्यात आले आहे.

अधिक वाचा  मराठा आरक्षण ‘सगेसोयरे’अधिसूचना ४ लाखांहून अधिक हरकती; 300 अधिकारी प्रक्रियेत सहभागी