पुणे: ‘जिसको चाहिए पाकिस्तान, उसको भेजो कब्रस्तान,’ असा धमकावणारा मजकूर लिहिलेलं पोस्टर पुण्यात लागल्याने एकच खळबळ उडाली आहे. या पोस्टरवर संघटनेचं नाव अत्यंत बारिक अक्षरात लिहिण्यात आलं आहे. त्यामुळे हे नाव दिसत नाही. मात्र, अचानक लागलेल्या या पोस्टरमुळे शहरात एकच खळबळ उडाली आहे.
नागरिकत्व दुरुस्ती कायद्यावरून देशात तणावाची स्थिती आहे. दिल्लीत तर या आंदोलनाला हिंसक वळण लागल्याने त्यात अनेकजण ठार झाले आहेत. असं असताना पुण्यातील एसपी कॉलेज चौकात हा बॅनर लागल्याने एकच खळबळ उडाली आहे. गेल्या महिन्यात बंगळूरू येथे एमआयएमचे नेते आणि खासदार असदुद्दीन ओवेसी यांची सभा पार पडली होती. या सभेत एका तरुणीने ‘पाकिस्तान जिंदाबाद’च्या घोषणा दिल्या होत्या. त्याच सभेचा फोटो या पोस्टरवर देण्यात आला आहे. या पोस्टरमध्ये सदर तरुणी पाकिस्तान जिंदाबादच्या घोषणा देताना दिसत आहे. तर ओवेसी त्या मुलीला बाजूला करताना दिसत आहेत. या पोस्टरखाली ‘जिसको चाहिए पाकिस्तान… उसको भेजो कब्रस्तान…’ असा धमकावण्याचा मजकूर लिहिण्यात आलेला आहे. येणाऱ्या जाणाऱ्या पुणेकरांचे आणि महाविद्यालयीन विद्यार्थ्यांचे लक्ष जाईल, अशा ठिकाणी हे पोस्टर लागल्याने अनेकांच्या भुवया उंचावल्या आहेत. अनेकांना हे पोस्टर पाहून संभ्रम निर्माण झाला असून त्यावर उलट सूलट चर्चा सुरू झाल्या आहेत.
काही नेटकऱ्यांनी हे पोस्टर ट्विटरवर शेअर केलं आहे. ‘पुण्यासारख्या मेट्रो शहरात उघड उघड पोस्टर लावून कब्रस्तानात धाडायला आपलं काय तालिबानी राज्य आहे का?’ असा सवाल नेटकरी करत आहेत. ‘हे द्वेषाचं विष महाराष्ट्रात पसरू देऊ नका,’ असं आवाहन निखिल पवार या नेटकऱ्याने केलं आहे. पवार यांनी हे पोस्टर ट्विट करताना त्याला मुख्यमंत्री कार्यालय, गृहमंत्री अनिल देशमुख आणि उपमुख्यमंत्री अजित पवार यांना टॅग केलं होतं. त्यानंतर अवघ्या काही तासांमध्येच पुणे पोलीस आणि पुणे पालिकेने हे पोस्टर तात्काळ काढून टाकलं. दरम्यान, याप्रकरणी पोलिसांनी अद्याप कुणावरही कारवाई केली नसल्याचं सूत्रांनी सांगितलं.
