मुंबई: ‘महाविकास आघाडी सरकारला अद्याप सूर गवसलेला नाही. कोणतीही दिशा नसलेले, गोंधळलेले हे सरकार आहे’, असे सांगत, शेतकरी कर्जमाफीवरून शेतकऱ्यांची केलेली दिशाभूल, महिलांवरील अत्याचार, आधीच्या सरकारच्या योजनांना दिलेली स्थगिती यांवरून राज्य सरकारला अधिवेशनात जाब विचारण्यात येईल, असा इशारा विधानसभेचे विरोधी पक्षनेते देवेंद्र फडणवीस यांनी रविवारी दिला. नागरिकत्व दुरुस्ती कायदा, राष्ट्रीय नागरिक नोंदणी, राष्ट्रीय जनसंख्या नोंदणी यांच्यासह छत्रपती शिवाजी महाराजांचा अवमान व स्वातंत्र्यवीर सावरकरांना अभिवादन करणारा ठराव यांवरून विरोधकांनी मुख्यमंत्री उद्धव ठाकरे यांची कोंडी करण्याची रणनीती आखली आहे, असे सांगत, ‘आमच्याविरोधात कोणतीही चौकशी करा, आम्ही घाबरणार नाही’, असे आव्हानही फडणवीस यांना सरकारला दिले.
मुख्यमंत्री उद्धव ठाकरे यांच्या नेतृत्वाखालील सरकारचे पहिले अर्थसंकल्पीय अधिवेशन आज, सोमवारपासून सुरू होत आहे. त्या पार्श्वभूमीवर सरकारने आयोजित केलेल्या चहापानावर विरोधकांनी बहिष्कार टाकला. देवेंद्र फडणवीस यांनी आघाडी सरकारवर जोरदार टीकाही केली. भाजपाचे प्रदेशाध्यक्ष चंद्रकांत पाटील, विधानसभेचे माजी अध्यक्ष हरिभाऊ बागडे, विधान परिषदेचे विरोधी पक्षनेते प्रवीण दरेकर, माजी मंत्री आशीष शेलार, संजय कुटे, राधाकृष्ण विखे-पाटील, संभाजी पाटील-निलंगेकर, भाई गिरकर आदी नेते यावेळी उपस्थित होते.
‘विरोधकांशी सुसंवाद साधण्यासाठी चहापानाला बोलावयचे असते. पण सरकारमधल्या तिन्ही पक्षांमध्येच सुसंवाद नाही. त्यामुळे चहापानाच्या निमित्ताने त्यांनी आपल्यामध्येच सुसंवाद साधावा आणि त्यानंतर त्यांनी विरोधी पक्षाला संवादासाठी बोलवावे’, असे सांगत, आम्ही सरकारच्या चहापानावर बहिष्कार टाकत असल्याचे फडणवीस यांनी स्पष्ट केले.
‘राज्यात महिलांवरील अत्याचार वाढले असून, या अत्यंत गंभीर मुद्द्यावर आम्हाला राजकारण करायचे नाही. महिला अत्याचार रोखण्यासाठी सरकारने उपाययोजना कराव्यात. आम्ही सरकारला पाठिंबा देऊ’, असे फडणवीस म्हणाले. या घटनांबाबत सरकारमध्ये संवेदनशीलता दिसत नाही. याचे कारण संपूर्ण पोलिस विभाग आहे. या विभागात सरकारच्या माध्यमातून राजकारण चालले आहे. पोलिस विभागावर प्रचंड दबाव आहे. त्याचा हा परिणाम आहे’, असे ते म्हणाले.
‘हे स्थगिती सरकार’
‘आघाडी सरकारने योजनांना स्थगिती दिलेली आहे. मराठवाडा वॉटरग्रीड, राष्ट्रीय पेयजल योजना,नगरविकास विभागाच्या विविध पाण्याच्या योजना, रस्ते, ग्रामसडक योजना, जलयुक्त शिवार आदी योजना सरकारने बंद केल्या. या बंद केलेल्या योजनांमध्ये बदल करून त्यांना दुसरे नाव देऊन या योजना निश्चित सुरू करतील. सरकारने या योजना बंद केल्या तरी जनतेसाठी असलेल्या योजना या जनताच बंद होऊ देणार नाही. हे सरकार स्थगिती सरकार आहे, अशी भूमिका गावोगावी तयार झाली आहे’, अशी टीकाही त्यांनी केली.
महाराष्ट्र विकास आघाडी सरकारच्या जाहिरनाम्यामध्ये, त्यांच्या किमान समान कार्यक्रमामध्ये जी आश्वासने दिली आहेत, ते आता शब्द फिरवण्याचा कार्यक्रम सरकारने चालवला आहे. शेतकऱ्यांना २५ हजार रुपये हेक्टरी अवकाळी अनुदान देण्याची सरकारने घोषणा केली, पण एक नवा पैसा शेतकऱ्यांना दिलेला नाही. २५ हजार रुपये हेक्टरी कोरडवाहूला आणि ५० हेक्टरी फळबागांना देण्याचे या सरकारच्या घटक पक्षांच्या नेत्यांनी देण्याचे घोषणा केली होती. पण त्यावरूनही त्यांनी घूमजाव केले आहे. कर्जमाफी नाही कर्जमुक्ती… अशा प्रकारची उक्ती या सर्वांनी केल्यानंतर अजूनही कुठल्याही प्रकारची मुक्ती नाही आणि माफीही नाही, असे फडणवीस म्हणाले. पीककर्जाव्यतिरिक्त कुठल्याही प्रकारची कर्जमाफी शेतकऱ्यांना दिलेली नाही. ट्रॅक्टर, अवजारे, कुकुटपालन आदी कुठल्या प्रकारचे कर्ज माफ होणार नाही. त्यामुळे ही कर्जमाफी सरसकट नाही’, असा आरोपही त्यांनी केला.
‘धान खरेदीत भ्रष्टाचार’
तूरखरेदी योग्य प्रकारे होत नाही. धान खरेदीमध्ये प्रचंड मोठ्या प्रमाणात भ्रष्टाचार, गैरव्यवहार होत आहे. या भ्रष्टाचाराचे पुरावे सरकारला देणार असून केंद्र सरकारच्या वतीने राज्य सरकार खरेदी करत असल्याने याबाबत केंद्र सरकारकडे तक्रार करणार असल्याचे फडणवीस यांनी सांगितले.
मुख्यमंत्र्यांचे अभिनंदन
सरकारवर हल्लाबोल करत असतानाच, एनआयए तपासावरून मात्र फडणवीस यांनी सरकारला पाठिंबा दिला. ‘राष्ट्रवादीचा विरोध असतानाही एनआयएला शहरी नक्षलीवादाचा तपास करू देण्याची भूमिका स्वीकारल्याबद्दल आपण मुख्यमंत्री उद्धव ठाकरे यांचे सभागृहात अभिनंदन करणार असल्याचे फडणवीस यांनी सांगितले. मुख्यमंत्र्यांनी सर्व योग्य पुरावे पाहिल्यानंतरच हा निर्णय घेतला असेल. याबाबत पोलिसांकडे प्रचंड प्रमाणात पुरावे आहेत. या प्रकरणात उच्च न्यायालय व सर्वोच्च न्यायालयात जाऊनही जामीनही मिळालेला नाही आणि निर्णयही पोलिसांच्या बाजूने आला. याची व्याप्ती महाराष्ट्रापुरता नाही तर देशातील अनेक राज्यांपर्यंत पोहोचलेली आहे, असे फडणवीस म्हणाले. सीएए, एनपीआरसंदर्भात मुख्यमंत्र्यांनी घेतलेल्या भूमिकेचेही फडणवीस यांनी स्वागत केले.
‘छत्रपती शिवाजी महाराजांचा तसेच त्यांच्या वंशजांचा अवमान महाराष्ट्रात किंवा मध्य प्रदेशात सातत्याने होत आहे. त्याबद्दल बोलायला शिवसेना तयार नाही. त्याबाबत कुठलीही कारवाई सरकार करत नाही. हे अत्यंत दुर्दैवी आहे. खुर्चीकरता विचार करणे सोडणे हे कितपत योग्य आहे? असा सवाल त्यांनी केला.
मराठा तरुणांची घेतली भेट…
मागील २७ दिवसांपासून मराठा आरक्षणाबाबत आपल्या मागण्यांसाठी आझाद मैदान येथे आंदोलन करणाऱ्या मराठा तरुणांची फडणवीस यांनी भेट घेतली. ‘मराठा तरुणांना राज्य सरकारने वाऱ्यावर सोडले असून या आंदोलनकर्त्या तरुणांच्या पाठीशी आम्ही उभे आहोत, विधिमंडळाच्या अधिवेशनात मराठा आरक्षणाबाबत या तरुणांच्या मागण्यांबाबत आम्ही सरकारला जाब विचारू’, असे फडणवीस म्हणाले. यावेळी विधान परिषदेचे विरोधी पक्षनेते प्रवीण दरेकर आणि आमदार नितेश राणे हे फडणवीस यांच्यासोबत होते.

अधिक वाचा  सानिया मिर्झा ने केली निवृत्तीची घोषणा; 2022 मध्ये शेवटचा सीजन