कणकवली: मुख्यमंत्री उद्धव ठाकरे यांनी कोकणला भरभरून दिले असल्यानेच नारायण राणे यांचा जळफळाट होत आहे, असे नमूद करत शिवसेना खासदार विनायक राऊत यांनी राणे यांच्यावर धारदार शब्दांत प्रतिहल्ला चढवला आहे.
मुख्यमंत्र्यांच्या कोकण दौऱ्यावर राणे यांनी टीकास्त्र सोडले होते. मुख्यमंत्री सिंधुदुर्ग जिल्ह्यात पर्यटनासाठी आले होते. केवळ घोषणांपलीकडे मुख्यमंत्र्यांनी कोकणाला काहीही दिले नाही, असा आरोप राणे यांनी काल केला होता. चिपी विमानतळावरूनही राणेंनी मुख्यमंत्र्यांवर उपरोधिक टीका केली होती. या टीकेला आज विनायक राऊत यांनी प्रत्युत्तर दिले.
मुख्यमंत्री कोकणात पर्यटक म्हणून आले होते; राणेंचा टोला
राऊत यांनी कणकवलीत पत्रकार परिषद घेऊन राणेंचे सर्व आरोप फेटाळून लावले व राणेंमुळेच कोकणचा विकास कसा रखडला असा प्रतिआरोप केला. मुख्यमंत्र्यांचा कोकण दौरा कमालीचा यशस्वी झाला असून ही बाब न पचल्यानेच राणे कोकणच्या विकासकामांत खोडा घालण्याचे काम करत आहेत. मात्र राणेंनी कितीही आडकाठी आणली तरी कोकणचा विकास आता थांबणार नाही. मुख्यमंत्र्यांनी दिलेल्या आश्वासनानुसार सर्व प्रकल्प वेळेतच मार्गी लागणार आहेत. १ मे रोजी चिपी विमानतळावर विमान उतरणार असे मुख्यमंत्र्यांनी सांगितले आहे आणि त्याची पूर्तता निश्चितच मुख्यमंत्री करतील असा विश्वास राऊत यांनी व्यक्त केला.

अधिक वाचा  पुणे- शाळा सुरू होणार की नाही आज बैठकीत होणार निर्णय