लखनऊः राष्ट्रवादी काँग्रेसचे अध्यक्ष शरद पवार यांनी राम मंदिराच्या मुद्द्यावरून केंद्रातील मोदी सरकारवर हल्लाबोल केला आहे. राम मंदिर बांधण्यासाठी तुम्ही ट्रस्टची स्थापना केली. मग मशिद बांधण्यासाठी ट्रस्ट का बनवता आली नाही? असा सवाल शरद पवारांनी केंद्र सरकारला केला आहे.
शरद पवार यांनी लखनऊमध्ये एक सभा झाली. यासभेत पवारांनी केंद्रातील सत्ताधारी भाजपच्या धोरणांना टीकेचं लक्ष्य केलं. राम मंदिर बांधण्यासाठी ट्रस्ट स्थापन केली. पण मशिद बांधण्यासाठी ट्रस्ट का बनवली नाही? देश तर सर्वांचा आहे आणि सर्वांसाठी आहे, असं म्हणत शरद पवारांनी केंद्र सरकारवर हल्लाबोल केला.
दिल्लीत आज राम मंदिर तीर्थ क्षेत्र ट्रस्टची पहिलीच बैठक झाली. या बैठकीत महंत नृत्य गोपाल दास यांची ट्रस्टच्या अध्यक्षपदी निवड करण्यात आली. या पार्श्वभूमीवर शरद पवार यांनी हे वक्तव्य करत केंद्र सरकारवर निशाणा साधला आहे. उत्तर प्रदेशातील पक्षाच्या राज्य परिषदेत ते बोलत होते.
भाजप जातीयवाद निर्माण करून समाजात फूट पाडण्याचा प्रयत्न करत आहे. सरकार जर मंदिरासाठी ट्रस्ट स्थापन करू शकतं तर मशिदीसाठी निधी उभारून ट्रस्ट का स्थापन करत नाही? असा प्रश्न पवारांनी केला. भाजपचं फूटीचं राजकारण करत आहे. सीएए हे त्याचं उघड उदाहरण आहे, असं पवार म्हणाले. जनता भाजपला कंटाळली आहे. भाजपने दिल्लीत संपूर्ण शक्ती पणाला लावली. पण भाजपचा दारुण पराभव झाला. महाराष्ट्रात आम्ही एकत्र येऊन भाजपला सत्तेपासून पायउतार केलं. तसंच केंद्रातही भाजपविरोधी पक्षांनी एकजूट होऊन भाजपला सत्तेतून हद्दपार करावं, असं आवाहन शरद पवार यांनी केलं.
उत्तर प्रदेश विधानसभेत मुख्यमंत्री योगी आदित्यानाथ यांनी आज राज्याचा अर्थसंकल्प सादर केला. पवारांनी आदित्यनाथ यांच्या अर्थसंकल्पावरही टीका केली. या अर्थसंकल्पात शेतकऱ्यांसाठी काहीच नाहीए. तसंच आदित्यनाथ सरकारने तरुणांना रोजगार देण्याचं कुठलंही आश्वासन दिलं नाही, अशी शरद पवार म्हणाले

अधिक वाचा  लैंगिक संबधांमुळे आरोग्य सुधारतं का? 10 सोप्या मुद्द्यात जाणून घ्या