महाराष्ट्राच्या मातीतला रांगडा मर्दानी खेळ म्हणजे कुस्ती. दिग्दर्शक सुजय डहाकेचा केसरी – saffron हा आगामी मराठी चित्रपट एका कुस्तीपटूच्या संघर्षाभोवती फिरणारा असून चित्रपटाचा रंगतदार टीजर नुकताच सोशल मिडीयावर प्रदर्शित करण्यात आला आहे. भावना फिल्म्स एल एल पी आणि पुणे फिल्म कंपनी प्रस्तुत केसरी – saffron या चित्रपटातून विराट मडके हा नवा चेहरा मराठी चित्रपटसृष्टीत पदार्पण करत आहे.

केसरी – saffron च्या टीजर वरून या चित्रपटात एका सामान्य घरातील पहिलवानाच्या जिद्दीचा प्रवास दिसणार असल्याचे समजते. ‘शाहू महाराजांचे दिवस गेले आता, कसरत, खुराकाचा खर्च सरकार करायचे’ हे वाक्य जयवंत वाडकर म्हणाता तर ‘दुधा शपथ घे, परत कधीच कुस्तीच्या आखाड्यात पाउल टाकणार नाही’ अशी शपथ उमेश जगताप घालत आहेत. यावरून चित्रपटातील पाहिलावानाच्या सभोवतीच्या वातावरणाचा अंदाज येतो तर मध्येच ‘आधीच गावाची घालवलेली इज्जत पुरी झाली नाय व्हाय तुम्हाला’ या वाक्यातून कथेत काहीतरी भन्नाट ट्वीस्ट असल्याचे दिसते.
टीजर पाहण्यासाठी येथे क्लिक करा

अधिक वाचा  इस्रोने अवकाशात 9 उपग्रह एकाच वेळी सोडले; ८ उपग्रह PSLV-XL रॉकेटच्या माध्यमातून प्रक्षेपित

केसरी – saffron या चित्रपटात विराट मडके याच्यासह महेश मांजरेकर, विक्रम गोखले, मोहन जोशी, नंदेश उमप, उमेश जगताप, छाया कदम, जयवंत वाडकर, नचिकेत पूर्णपात्रे, सत्यप्पा मोरे, ज्ञानरत्न अहिवळे, रूपा बोरगांवकर, पद्मनाभ बिंड यांच्या भूमिका आहेत. संकलन आणि दिग्दर्शन सुजय डहाकेचे असलेल्या या चित्रपटाचे लेखन नियाज मुजावर यांनी केले आहे. ए. व्ही. प्रफुल्लचंद्र यांनी संगीत दिले असून क्षितिज पटवर्धन, वैभव जोशी, संजय टेम्भूर्णी यांच्या गीतांना मोहन कन्नन, ऋचा बोन्द्रे, जयदीप वैद्य, मनीष राजगिरे यांनी स्वरसाज चढविला आहे. चित्रपटाला पार्श्वसंगीत साकेत कानेटकरने दिले आहे तर ध्वनी मुद्रण कुणाल लोळसुरे यांनी केले आहे. कलाकारांची वेशभूषा नामदेव वाघमारे, अनुषा वैद्य यांनी तर रंगभूषा संतोष डोंगरे यांनी केली आहे. संदीप जिएन. यादव चित्रपटाचे डीओपी असून केसरी – saffron चे निर्माता संतोष रामचंदानी आणि सह निर्माता मनोहर रामचंदानी आहेत.

अधिक वाचा  शिवसेना कुणाची? निवडणूक आयोगासमोर ‘या’ दिवशी सुनावणी

‘गाव नसना का तुमच्या संगट मी तर हाय’ असे म्हणत साथ देणारी मैत्रीण, ‘सामन्यासारखा सराव दररोज केला तर सराव केल्यासारखा सामना निघून जाईल’ असा विश्वास देणारा वस्ताद आणि एका सामान्य कुटुंबातील पाहिलवान ‘महाराष्ट्र केसरी’ होण्यासाठी काय मेहनत घेतात, संघर्ष करतात याचा उलगडा येत्या २८ फेब्रुवारी रोजी संपूर्ण महाराष्ट्राला होणार आहे.

राष्ट्रीय पुरस्कार विजेता दिग्दर्शक सुजय डहाके याने वैविध्यपूर्ण मराठी चित्रपट दिले आहेत. चार वर्षांच्या कालावधी नंतर सुजय त्याच्या चाहत्यांना नवीन वर्षाची अफलातून भेट घेऊन येत असून त्याच्या आगामी मराठी चित्रपटाचे नाव ‘केसरी’ – saffron आहे. या चित्रपटाच्या पोस्टरचे अनावरण नुकतेच ‘महाराष्ट्र केसरी’ स्पर्धेत अंतिम लढतीपूर्वी माजी केंद्रीय मंत्री आणि महाराष्ट्र राज्य कुस्तीगीर परिषदेचे अध्यक्ष शरद पवार यांच्या हस्ते करण्यात आले.
या प्रसंगी खासदार श्रीनिवास पाटील, खासदार श्रीरंग बारणे, अनिरुद्ध देशपांडे, अभिनेते महेश मांजरेकर, दिग्दर्शक सुजय डहाके, ‘केसरी’ – saffron मधून चित्रपटसृष्टीत पदार्पण करणारा अभिनेता विराट मडके, निर्माते संतोष रामचंदानी, सहनिर्माते मनोहर रामचंदानी आदी मान्यवर उपस्थित होते.

अधिक वाचा  महाराष्ट्रातही समान नागरी कायदा लागू ? उपमुख्यमंत्री फडणवीसांनी महत्त्वाचं मत मांडलंय.

भावना फिल्म्स एलएलपी आणि पुणे फिल्म कंपनी प्रस्तुत ‘केसरी’ – saffron ची कथा कुस्ती भोवती गुंफण्यात आलेली आहे. कुस्ती खेळण्याची आवड असलेला अत्यंत गरीब घरातील एक मुलगा महाराष्ट्रातील मानाची ‘महाराष्ट्र केसरी’ स्पर्धा जिंकण्याचा प्रयत्न करतो. या प्रवासादरम्यान त्याच्या आयुष्यात येणारे विविध अडथळे, पहिलवानांचे कष्ट, त्यांना घडवणाऱ्या वस्तादांची मेहनत आणि कुस्तीच्या आखाड्या बाहेरचे राजकारण या सर्वांचा वेध या चित्रपटात घेण्यात आला आहे.
‘शाळा’, ‘आजोबा’, ‘फुंतरू’ या चित्रपटांनंतर सुजय पुन्हा एकदा मराठी बॉक्स ऑफिसचे मैदान मारायला सज्ज झाला आहे. ‘केसरी’ – saffron हा मराठी चित्रपट येत्या २८ फेब्रुवारी रोजी महाराष्ट्रातील प्रेक्षकांच्या भेटीला येणार आहे.