माजी नगरसेवक, तथा पुणे महानगरपालिकेचे माजी विरोधीपक्षनेते श्री. उज्वल केसकर यांनी कोथरूड विधानसभा निवडणूकीत अर्ज न भरण्याचा निर्णय घेतला आहे. राष्ट्रीय स्वयंसेवक संघाचे स्वयंसेवक असलेल्या श्री. केसकर यांनी आपल्यासाठी राष्ट्रीय स्वयंसेवक संघाचा आदेश शिरसावंद्य असून आपण नामनिर्देशनपत्र भरणार नाही अशी माहिती प्रसिद्धी पत्रकाद्वारे दिली.
आपल्या नगरसेवक तसेच विरोधीपक्षनेते पदाच्या कार्यकाळात श्री. उज्वल केसकर यांनी कोथरूड विधानसभा मतदारसंघात मोठ्या प्रमाणावर विकासकामे केली. गुंठेवारी सारखा प्रश्न सोडवला. मेजर प्रादीप ताथवडे उदयान साकारले, कोथरूड मध्ये मुलभूत सोयी सुविधा उपलब्ध करून दिल्या. त्यांनी केलेल्या कार्यामुळे कोथरूडमध्ये त्यांना मोठा जनाधार मिळाला. या विकास कामांच्या जोरावर श्री केसकर यांनी कोथरूड विधानसभा निवडणूक लढण्याची घोषणा केली होती.
आज ते नामनिर्देशनपत्र दाखल करणार होते. त्यापूर्वीच सुहास कुलकर्णी यांच्या निवासस्थानी आमदार चंद्रकांत पाटील यांची भेट घेऊन त्यांच्याशी चर्चा केली. स्वयंसेवक असल्याने संघाचा आदेश शिरसावंद्य मानून नामनिर्देशनपत्र भरणार नाही असा निर्णय त्यांनी घेतला आहे. तसेच निवडणूकीत आपल्या असंख्य कार्यकर्त्यांसह चंद्रकांत दादा पाटील यांचे काम करणार असून त्यांना जाहीर पाठींबा आहे अशी माहिती देखील त्यांनी प्रसिद्धी पात्रकाद्वारे दिली आहे.
