बारामती : रासपचे अध्यक्ष महादेव जानकर यांच्यानंतर भाजपमधील अनेक नेत्यांनी बारामती लोकसभा मतदारसंघातून निवडणूक लढवण्याची इच्छा व्यक्त केलेली असतानाच या मतदारसंघातून निवडणूक लढवण्यासाठी आणखी एका इच्छुकाची भर पडली आहे. भूमाता ब्रिगेडच्या अध्यक्षा तृप्ती देसाई यांनी बारामतीच्या खासदार सुप्रिया सुळे यांच्याविरोधात निवडणूक लढवणार असल्याचं जाहीर केलं आहे.
‘बारामती लोकसभा मतदारसंघातील अनेक भागातून निवडणूक लढवण्यासाठी नागरिकांकडून सांगितलं जात आहे. अनेकांचे पाठिंबाचेही फोन येत आहेत. त्या अनुषंगानेच मी बारामती लोकसभा मतदारसंघात जनसंपर्क दौऱ्याला सुरुवात करणार आहे. मात्र बारामती जिंकायची असेल तर भारतीय जनता पक्षाने जर मला उमेदवारी दिली, तर मी बारामतीत इतिहास घडवू शकते,’ असा विश्वास तृप्ती देसाई यांनी व्यक्त केला आहे.
सुप्रिया सुळेंवर टीकास्त्र
‘शरद पवार यांनी राष्ट्रवादीच्या अध्यक्षपदाचा राजीनामा दिल्यानंतर खासदार सुप्रिया सुळे यांचे नाव पुढे येईल, असे वाटले होते. मात्र त्या तेथे सक्षम ठरल्या नसल्याचे सांगून बारामती मतदारसंघातही खासदार सुळे या सक्षम नाहीत. या लोकसभा मतदारसंघात सध्या परिवर्तन हवं आहे. गेली १५ वर्ष एकच व्यक्ती खासदार म्हणून निवडून जात आहे. शिवाय आमचा घराणेशाहीला विरोध आहे. त्यामुळे मी बारामती लोकसभा मतदारसंघाची निवडणूक लढवणार आहे,’ असं तृप्ती देसाई यांनी म्हटलं आहे.
पुढे बोलताना देसाई म्हणाल्या की, ‘याआधी राष्ट्रवादीचे अध्यक्ष शरद पवार, विरोधी पक्षनेते अजित पवार हे खासदार म्हणून निवडून गेले. त्यानंतर सुप्रिया सुळे खासदार झाल्यानंतर आम्हाला आनंद झाला होता की एखादी महिला या मतदारसंघाची प्रतिनिधित्व करत आहे. मात्र १५ वर्षांपासून त्या बारामती मतदारसंघाचे प्रतिनिधित्व करत आहेत. २०२४ च्या लोकसभा निवडणुकीत तरी त्यांच्या पदाधिकाऱ्यांना व कार्यकर्त्यांना संधी मिळेल असे वाटत होते. मात्र खासदार सुळे याच पुन्हा मतदारसंघात फिरताना दिसतात. इतक्या वर्षांपासून काम करत असणारे कार्यकर्ते-पदाधिकारी केवळ सतरंज्या उचलण्यापुरतेच आहेत काय?’ असा सवाल उपस्थित करून देसाई यांनी सुप्रिया सुळेंवर निशाणा साधला.
